KOVALIMA , 10 fevereiru 2025 (TATOLI) – Servisu Munisipál Protesaun Sívil, Jestaun Dezastre Naturál (SMPSJDN) prevee orsamentu rihun-40 atu responde apoiu emerjénsia ba vítima sira bainhira akontese dezastre naturál iha munisípiu Covalima.
Diretór Servisu Munisipál Protesaun Sívil Jestaun Dezastre Naturál, João Martins informa katak Protesaun Sívil, Jestaun Dezastre Naturál prevee orsamentu tanba kada tinan munisípiu Covalima sempre akontese dezastre naturál ho tipu inundasaun.
“Preparasaun atu responde ba dezastre naturál ho tipu hanesan erosaun, anin-sobu uma no ahi-han uma no inundasaun ita prevee orsamentu rihun-40. Ita halo evakuasaun preve orsamentu rihun tolu atu fó han ba vítima sira iha sentru evakuasaun”, Diretór Servisu Munisipál Protesaun Sívil, Jestaun Dezastre Naturál, João Martins dehan ba TATOLI, iha Bairru Costa, ohin.
Dirijente ne’e esplika katak, SMPSJDN Kovalima fó apoiu emejénsia ai-han ho la’ós ai han ne’ebé mak dezastre naturál ho parseiru sira apoiu hanesan de’it la iha diferensia hanesan foos kilograma 25, dos (kaixa) ida no seluk.
Daudaun ne’e Servisu munisipál prepara ona estoke atu fó apoiu emejénsia iha armajen hanesan foos marka Manuvitória ho kilograma 25 hamutuk 300 supermie dos 300 no apoiu emejénsia sira seluk tan.
Bazeia ba dadus iha tinan kotuk Servisu Munisipál Protesaun Sívil Jestaun Dezastre Naturál fó apoiu emejénsia ba xefi família hamutuk 726 ne’ebé maioria mai husi postu Zumalai no postu Suai ho tipu dezastre inundasaun.
Atu labele fó hela emejénsia ba vítima dezastre naturál ho tipu inundasaun, Jestaun Dezastre Naturál Covalima servisu hamutuk ona ho Servisu Munisipál Obra Públika (SMOP), atu haree problema kona-ba akontese dezastre hanesan inundasaun atu halo normalizasaun.
Kada tinan akontese dezastre naturál; inundasaun, tanba impaktu husi volume mota Tali-oan, Lakonak no Tafara boot. Maibé, mota Tafara halo ona normalizasaun nune’e labele hamosu ona inundasaun.
“Ita-nia agrikultór sira halai natar hodi hatama bee ba natar entaun bee halai tuir bee-dalan ne’ebé mak ita-nia agrikultór sira kria. Bainhira agrikultór sira la kria bee-dalan, bainhira udan boot mós la hamosu dezastre naturál ho tipu inundasaun,” nia dehan.
Tuir planu iha loron 19 fevereiru ne’e halo preparasaun atu fó ba ekipa Komisaun Jestaun Dezastra Munisipál (KJDM) nune’e bainhira akontese dezastre ekipa sira tuun ba terenu direta atu haree ida-idak nia servisu.
Jornalista:Celestina Teles
Editór :Rafael Ximenes de A. Belo
