DILI, 12 Fevereiru 2025 (TATOLI)-Ministériu Edukasaun simu fundu rihun-$54 husi governu Nova Zelándia ba programa Halimar Aprende no Deskobre Susesu (HANDS).
Verba referida konstrui fatin formasaun ba profesór Ensinu Pre-Eskolár (EPE) sira. “Ita uza rihun-$54 ba fatin rua, salaun ba formasaun no mós edifisiu ne’ebé ekipa uza ba materiál no rekursu sira”, Jestór Seniór ba Programa HANDS, Agusto Ferreira Soares, dehan iha Balide, kuarta ne’e.
Nia dehan, konstrusaun ida-ne’e la uza kompañia tanba gastu boot liu. “Obra ida-ne’e ekipa tékniku HANDS mak parte aprovizionamentu no lojístika. Sira servisu hamutuk ho badaen lokál, akompañamentu husi tékniku HANDS, no ida-ne’ebé ita hahú iha tinan kotuk Novembru no remata iha Janeiru”.
Nia dehan, durante ne’e espasu difikulta servisu ekipa HANDS. “Ita agradese ba INFORDEPE no Ministériu Edukasaun tanba oferese fatin ba HANDS hodi uza servisu”, nia dehan.
Prezidente Institutu Nasionál ba Formasaun Dosente no Profisionál Edukasaun (INFORDEPE), Domingos Martins, hatete sira oferese fatin ba HANDS nune’e bele fasilita formasaun ba manorin sira, liu-liu ensinu pre-eskolár sira.
“Ita fó fatin ba sira, no sira mak konstrui ho orsamentu ne’ebé Governu Nova Zelándia fó ba ita liuhusi programa HANDS ne’e rasik”, nia tenik.
Notísia relevante: Labarik besik rihun 30 sai benefisiáriu ba Programa HANDS
Agosto mos hatutan, durante ne’e módulu lubuk ida mak programa HANDS elabora ona hodi fasilita ensinu pre-eskolár sira.
“Módulu purvolta 58 mak ita prodús ona husi 90-resin ne’ebé mak ita fasilita ba ensinu pre-eskolár sira”, nia informa.
Jornalista : Osória Marques
Editora : Rita Almeida
