OEKUSI, 12 Fevereiru 2025 (TATOLI) – Sentru Saúde Kiumaonteko iha sub-rejiaun Pante Makasar, rejista labarik hamutuk 8000-resin mak sai alvu atu simu vasinasaun Difteria no Tetanus (DT) no Vírus Papiloma Umanu (HPV, sigla inglés).
Xefe Sentru Saúde Komunitária Kiumaonteko, Anita Maria da Cunha, relata benefisíariu husi vasinasaun ne’e atu prevene husi moras difteria no tetanus no proteje labarik feto sira husi kankru serviks.
“Atividade kona-ba imunizasaun Difteria Tetanus fó ba labarik estudante sira ho idade tinan neen ba feto no mane no vasinasaun HPV ne’e ba labarik sira ho idade 11 to’o 14 ba feto de’it, ne’ebé programa ne’e ita hala’o kada tinan dala ida,” dehan nian iha sentru saúde Kiumaonteko, ohin.
Alvu ba imunizasaun DT ho HPV ne’e ba iha eskola 18 ho totál labarik ne’ebé simu vasinasaun hamutuk 8000-resin.
Ho alvu ne’e, Xefe Sentru Saude ne’e informa, ohin konsege vasina estudante hamutuk 194.
“Agora profisionál saúde sira kontinua la’o vizita eskola sira, hanesan ohin ita hala’o iha EBF 30 Agostu Masin, tanba antes ne’e ita iha ona kooperasaun ho servisu edukasaun kona-ba labarik sira atu simu vasinasaun ne’e,” nia afirma.
Kona-ba vasinasaun ne’e, Koordenadór EBF 30 Agostu Masin, Belarmino Beto, hateten vasinasaun iha EBF 50 Masin ba de’it primeiru Anu ho totál alunu 194.
“Antes ne’e sira mai koordena ami iha eskola, entun ami fó sai aviza atu inan-aman mós bele hatene mai observa tanba labarik sira sei ki’ik, ne’ebé ha’u konsidera vasinasaun ne’e importante atu prevene no proteje oan-sira livre husi moras hanesan kankru serviks no tetanus nian,” nia dehan.
Notísia relevante:Prevene kankru serviks, saúde Oé-Cusse introdús impaktu vasina HPV iha Pante Makasar
Jornalista: Abílio Elo Nini
Editór: Florencio Miranda Ximenes
