DILI, 18 Fevereiru 2025 (TATOLI)-Governu liuhusi Ministériu Administrasaun Estatál (MAE), tersa ne’e simu mákina fura bee husi Embaixada Xina iha Timor-Leste.
Makina referida sei apoiu servisu agrikultura iha munisípiu Ainaru, Baukau, Kovalima, Manatutu, Manufahi no Vikeke.
“Tempu ne’ebá ita asina akordu ba interkambiu kulturál, apoiu bolsa ba área agrikultura no hakiak fahi. Entaun hosi akordu ne’e provínsia Hunan apoiu mákina fura bee barak no ita haree barak entaun tenke fahe”, Ministru MAE, Tomas do Rosario Cabral, dehan iha resintu MAE, Kolmera.
Konselleiru Embaixada Xina iha Timor-Leste, Zhao Suocheng, hatete husi apoiu ne’e sei konstrui posu bee ualu iha munisípiu neen no sei konklui iha tinan ne’e.
“Konstrusaun posu bee sira ne’e sei fó benéfisiu ba komunidade ne’ebé mak besik iha bee posu sira”, katak Zhao.
Nia dehan agradese ba kooperasaun ne’e. “Hafoin konstrusaun, kualidade bee sei garantia atu prenxe kritériu bee moos ne’ebé mak estabelese ona husi Governu Timor-Leste hodi fornese kualidade bee ba komunidade”, nia dehan.
Notísia relevante : Governu fasilita uma ba Tékniku Agrikultura hosi Provínsia Hunan
Jornalista : Osória Marques
Editora : Rita Almeida
