TL presiza halo kooperasaun ho nasaun amigu iha área importante sira

DILI, 20 Fevereiru 2025 (TATOLI)—Ministru Negósiu Estranjeiru no Kooperasaun (MNEK) Bendito Freitas, hateten Timor-Leste presiza halo kooperasaun ho nasaun amigu sira iha mundu iha área importante sira hanesan polítika, ekonomia, kultura no istória.

Ho polítika Timor-Leste nian, nia dehan, hakarak halo belun ho nasaun hotu iha mundu nune’e mak iha kuarta-feira (19 Fevereiru 2025) ne’e, embaixadór naun-rezidente 10-resin entrega kredensiál ba Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili.

“Embaixadór sira komesa ko’alia ona kona-ba oinsá atu servisu hamutuk, sira-ne’ebé mai husi Hungaria, Guatemala, Uruguay, Namíbia, Israel, Rúsia, Argentina no seluk tan ne’ebé ha’u hanoin importante tebes ba Timor-Leste nia kooperasaun iha termu polítika, ekonomia, kultura, istória, relasaun ho sira,” Ministru Bendito hateten ba jornalista sira iha edifisiu MNEK, Dili, kinta ne’e.

Nia hatutan, horisehik (kuarta, 19 Fevereiru 2025) kalan ne’e, Prezidente Repúblika José Ramos Horta hato’o diskursu ida-ne’ebé di’ak tebes, iha forma fragmentu no narrativa sira kona-ba realidade sira dezenvolvimentu Timor-Leste nian.

Timor-Leste mós hola parte iha Família Nasaun Unida nian, ho nune’e tenke nakloke aan ba nasaun hotu iha mundu hodi sai amigu no servisu hamutuk haree ba povu nia moris di’ak, no kria pás no estabilidade.

“Iha Nasaun Unida, ho karáter ida-ne’e, ita organiza hamutuk akollimentu ida ba korpu diplomátiku, embaixadór sira, xefe misaun sira, atu haree no fahe kona-ba Timor-Leste,” nia dehan.

Embaixadór sira tuir mai ne’e aprezenta sira-nia karta kredensiál ba Prezidente Repúblika, José Ramos Horta, mak hanesan;

Armin Limo, Embaixadór Extra-Ordináriu no Plenipotensiáriu ba Bosnia no Herzegovina iha Timor Leste, ne’ebé hela iha Jakarta, Indonézia.
Mayor Jacobo Cuyún Salguero, nu’udar Embaixadór Estraordináriu no Plenipotensiál Repúblika Guatemala nian iha Timor Leste, domisiliadu iha Jakarta, Indonézia.
Jessica Maria Lópes Piña, Embaixadora Estraordinária no Plenipotensiária Repúblika Venezuela nian iha Timor Leste, ne’ebé hela iha Singapura.
Prof. Dotor. Talip Küçükcan, Embaixadór Estraordináriu no Plenipotensiáriu Repúblika Turkia nian iha Timor Leste, domisiliadu iha Jakarta, Indonézia.
Sergei Gennadievich Tolchenov, Embaixadór Estraordináriu no Plenipotensiál Federasaun Rúsia nian iha Timor Leste, domisiliadu iha Jakarta, Indonézia.
Marc Gerritsen, Embaixadór Extra-Ordináriu no Plenipotensiáriu Reinu Olanda nian iha Timor Leste, domisiliadu iha Jakarta, Indonézia.
Tomas Ferko, Embaixadór Extra-Ordináriu no Plenipotensiál Repúblika Eslovákia nian iha Timor Leste, domisiliadu iha Jakarta, Indonézia.
Roberto Colamine, Embaixadór Extra-Ordináriu no Plenipotensiáriu Repúblika Itália nian iha Timor Leste, domisiliadu iha Jakarta, Indonézia.
Eliyahu Vered Hazan, Embaixador Extra-Ordinariu no Plenipotensiariu Estadu Israel iha Timor Leste, ne’ebe domisiliadu iha Singapura.
Tanya Dimitrova Dimitrova, Embaixadora Extraordinária no Plenipotensiária Repúblika Bulgaria iha Timor Leste, ne’ebé domisiliadu iha Jakarta, Indonézia.
Herman Pule Diamonds, Embaixadór Extraordináriu no Plenipotensiál Repúblika Namíbia nian iha Timor Leste, domisiliadu iha Kuala Lumpur, Malázia.
Dianela Joselina Pi Cedras, Embaixadora Extraordinária no Plenipotensiária Repúblika Orientál Uruguai iha Timor Leste, domisiliadu iha Canberra, Austrália.
Eliyahu Vared Hazan, Embaixadora Extraordinária no Plenipotensiária Israel nian iha Timor Leste, ne’ebé domisiliadu iha estranjeiru.