OEKUSI, 24 Fevereiru 2025 (TATOLI) – Xefe Gabinete ba Sekretária Rejionál Finansa iha Rejiaun Administrativa Espesiál Oekusi Ambeno (RAEOA), Costáncio Suni, rejeita rai osan Estadu iha nia rezidénsia privadu, nune’e konsidera informasaun ne’ebé virál iha plata forma rede sosiál hanesan informasaun falsu.
“Informasaun ne’ebé daudaun espalla hela iha rede sosiál ne’e, ha’u hanoin buat ne’e laloos ida, ne’e hanesan akuzasaun ida atu hamonu de’it ha’u-nia dignidade tanba Xefe Gabinete ba asuntu Finansa laiha kompetensia atu rai osan Estadu iha uma no mós iha servisu fatin. Ha’u la ka’er osan no la jere mós osan Estadu nian,” Xefe Gabinete ne’e hateten ba TATOLI,I.P hodi rejeita informasaun falsu iha rede sosiál iha kna’ar fatin Oekusi, ohin.
Tuir nia, ema ne’ebé prosesa orsamentu Estadu mak sira-ne’ebé parte tékniku finansa tanba responsabiliza kedan iha sistema, la’ós Xefe Gabinete.
Imajen ne’ebe espalla iha rede sosiál ne’e, nia esplika loos ne’e iha loron domingu, 29 Dezembru 2024, dadersan
Liga ba imajen ne’ebé espalla iha rede sosiál kona-ba sura osan iha nia rezidénsia ne’e, nia esplika loos ne’e iha loron Domingu,29 Dezembru 2024, (tuku 07:00, dadersan), funsionáriu ida husi Unidade Administrasaun Finansa Servisu Korporativu (UAFSC) iha Gabinete Prezidente Autoridade mai uma hodi husu ajuda atu sai testamuña ba orsamentu ba programa road-race hamutuk rihun $15 ne’e atu fahe ba grupu sira ne’ebé sai vensedór iha programa referidu.
Razaun husu ajuda mak, nia relata dahuluk funsionariu ne’e mai husu ajuda atu kontaktu hela sub-komisaun road-race RAEOA nian ne’ebé responsabiliza husi Vise-Koordenadór ZEEDOA, Regio da Cruz Salu, atu mai simu hela osan sira-ne’e.
“Ha’u husu funsionáriu ne’e nusa mak la bá fó direita ba sira komisaun, maibé nia dehan Xefe UAFSC viajen hela bá Dili no ofisiál ka’er osan ne’e mós feriadu ona bá foho. Tanba osan ne’e foti iha iha sesta, 27 Dezembru 2024 atu uza iha segunda 30 dezembru 2024, maibé iha sábadu kalan komisaun road-race ezije Xefe UAFSC atu domingu, dader ne’e tenke entrega osan atu fahe prémiu ba grupu sira ne’ebé sai vensedor iha kompetisaun finál ba road-rice iha domingu lorokraik, tanba osan bo’ot funsionáriu tauk atu entrega ba komisaun, depois nia mós ladún koñese komisaun sira-ne’e,”nia esplika
Nune’e, nia afirma kontaktu direitamente ba Prezidente Komisaun Organizadora, Regio da Cruz Salu atu mai simu osan sira-ne’e, nune’e husi komisaun road-rice ne’e haruka kedan funsionáriu finansa na’in-rua mai ho karreta ZEEDOA nian hodi foti osan sira-ne’e iha nia rezidénsia Masin.
“Osan ne’e entrega de’it tanba atu asina termu entrega, maibé ne’e só ofisiál finansa husi UAFSC mak bele halo, entaun ami hasai hela foto nu’udar evidénsia ba ha’u, katak ha’u mak sai testamuña tanba osan bo’ot hamutuk rihun $15,” nia klarifika.
Nia hatutan nia parte laiha kompeténsia atu jere no ka’er osan Estadu nian iha eventu programa road-rice tanba responsabiliza husi UAFSC Gabinete Prezidente Autoridade nian.
“Ida-ne’e mak ema foti fali foto sira-ne’e dehan ha’u mak rai osan iha uma, ne’e laloos, tanba lei la fó dalan atu rai osan Estadu iha uma no halo uma sai fali edifísiu ba atendimentu Estadu nian, ha’u só tulun de’it tanba situasaun emerjénsia liuliu loron domingu ne’e kantor hotu taka,” nia relata tan
Xefe Gabinete sei hato’o keixa ba MP
Ho informasaunu ne’e, nia afirma sente ofendidu tebes nune’e nia parte sei hato’o keixa ofisiál ida ba Ministériu Públiku atu prosesa no halo investigasaun ba ema irresposabilidade ne’e.
“Ha’u sente ne’e hafo’er ha’u-nia naran tanba públiku kestiona no haree, ne’ebé ha’u konsidera ofendidu, nune’e ha’u agora prepara ona keixa atu hatama ba Ministériu Públiku atu halo investigasaun,” katak nia.
Entretantu, Prezidente Komisaun Organizadora Road-Rice, Regio da Cruz Salu, Atuál Vise-Koordenadór ZEEDOA, rekoñese katak eventu road-rice mak presiza orsamentu ne’e atu uza ba prémiu atividade road-rice ne’e.
“Ida-ne’e oposizaun sira mak halo propaganda falsu tanba laiha relasaun ho rai osan Estadu iha uma, kona-ba osan ne’e atu fahe prémiu ba atividade road-rice, sim ami mak presiza osan sira-ne’e ho urjente iha loron domingu ne’e ami husu Xefe Gabinete ne’e hanesan sasin de’it ,” nia informa.
Notísia relevante:Partisipante korrida cavalo Oé-Cusse lamenta tanba seidauk simu prémiu
Jornalista: Abílio Elo Nini
Editór: Florencio Miranda Ximenes
