KOVALIMA, 26 fevereiru 2025 (TATOLI)-Ministériu administrasaun estatál (MAE), liuhusi Diresaun jerál simplikasaun administrasaun lokál atualiza dadus Portál munisipál ba estrutura autoridade iha Kovalima.
Xefe departamentu simplikasaun no administrasaun MAE, Aleixo Soares, esplika, iha Portál munisipál ligasaun ho dadus populasaun, servisu munisipál no diretór delegasaun territoriál sira no servisu ne’ebé mak hetan investimentu hanesan setór Edukasaun, Saúde no Agrikultura programa liga ho Merenda Eskolár, Projetu PNDS no Projetu PDIM.
“Ita mai atualiza nafatin dadus ba estrutura nune’e estrutura mós intende katak importánsia Portál munisipál ba sira oinsá tanba Portál munisipál hanesan plataforma baze dadus ba iha prosesu dezenvolvimentu iha Timor-Leste”, Aleixo Soares, informa ba jornalista sira iha salaun AMC, ohin.
Baze legál númeru 3/2025 kona-ba balkaun úniku no Portál munisipál, https://covalima.gov.tl/
Portál ne’e kompostu husi Perfil munisípiu, Dadus katálogu, Balkaun Úniku no Mapa.
Perfil munisipál mak hanesan maneira ida hodi hele haree dadus ho forma ne’ebé rezumida fasil no lalais ba munisípiu ida-idak.
Dadus katálogu seksaun ida husi portál munisípiu ne’ebé dadus husi setór dezenvolvimentu hitu hanesan Demografia, Edukasaun, Infraestrutura, Jéneru, Sosio-ekonómiku, Agrikultura no Saúde ne’ebé hatudu husi nível suku to’o nasionál ho reprezentasaun dadus gráfiku tabela mapa ne’ebé interativu.
Plataforma ne’e inísia husi Programa nasaun unida ba dezenvolvimentu (PNUD) ho MAE. Ba futuru, polítika ministériu katak portál sei hela ba munisípiu.
Sekretáriu Munisipál Planeamentu Investimentu no Dezenvolvimentu integradu, Caetano dos Santos Ribeiro fó hanoin katak Portál munisipál sai hanesan plataforma dijitalizasaun liuhusi plataforma dijitál.
“Ita ko’alia Portál munisipál atu akumula servisu hotu hahú husi diretór munisipál, diretór delegasaun territoriál, postu administrativu hitu, suku to’o iha aldeia sira”, nia esplika.
Jornalista:Celestina Teles
Editór: Rafael Ximenes de A. Belo
