Brigadista 337 tuir teste eskrita iha STAE Kovalima

KOVALIMA, 16 Novembru 2026 (TATOLI) – Sekretariadu Tékniku Administrasaun Eleitorál (STAE) Munisípiu Kovalima, segunda-feira ne’e, hala’o teste eskrita ba kandidatu brigadista na’in-337, nu’udar parte husi prosesu rekrutamentu atu prepara eleisaun prezidensiál 2027.
“Bazeia ba dadus kandidatu sira ne’ebé submete dokumentu, total hamutuk na’in-467. Husi númeru ne’e, kandidatu na’in-337 mak pasa iha faze verifikasaun dokumentu no agora tuir teste eskrita,” Diretór STAE Munisípiu Kovalima, João Tilman relata ba jornalista sira iha Kampung Baru, Kovalima.
Prosesu rekrutamentu ne’e hala’o hodi prepara brigadista sira atu fó apoiu tékniku durante eleisaun prezidensiál 2027. Hafoin teste eskrita, kandidatu sira ne’ebé hetan rezultadu di’ak sei kontinua ba faze entrevista antes tama iha prosesu selesaun finál.
Nune’e, STAE Munisípiu Kovalima identifika ona sentru votasaun hamutuk 111, no kada sentru votasaun sei iha brigadista ida atu apoia servisu tékniku durante prosesu eleisaun.
Iha inísiu STAE identifika sentru votasaun hamutuk 114. Maibé, depoisde halo avaliasaun, sentru votasaun tolu la inklui tanba lokalizasaun sentru votasaun sira ne’e besik malu.
Iha preparasaun téknika, durante fulan Jullu no Agostu, STAE hala’o ona levantamentu no identifikasaun ba sentru votasaun sira iha Munisípiu Kovalima.
Husi rezultadu levantamentu ne’e, STAE identifika dezafiu balun, hanesan asesu estrada ba sentru votasaun iha área remota no falta ekipamentu, inklui kadeira no meza iha sentru votasaun balun.
Atu rezolve problema sira ne’e, STAE sei buka solusaun apropriada, inklui kontrata ema atu ajuda transporta ekipamentu no materiál eleitórál ba sentru votasaun sira ne’ebé lokaliza iha área ho asesu difísil.
“Ba fatin balu, liuliu iha Postu Administrativu Fatululik, bainhira tempu udan presiza esforsu no pasiénsia atu asesu. Iha Postu Administrativu Fohorem, Suku Dato Tolu, estrada mós la di’ak, nune’e ami presiza kontrata ema atu ajuda lori materiál ba sentru votasaun,” nia dehan.
Enkuantu ne’e, kandidatu brigadista, Ingnasio Marçal Nunes, hato’o nia kontentamentu tanba hetan oportunidade atu partisipa iha teste eskrita ne’ebé STAE organiza.
Nia hateten katak, teste ne’e sai mós nu’udar oportunidade atu aumenta koñesimentu no komprensaun kona-ba kna’ar brigadista iha apoiu tékniku ba prosesu eleisaun.
“Ha’u sente kontente no orgullu tanba hetan oportunidade atu tuir ezame. Ezame ne’ebé ami hala’o iha salaun STAE la’o ho di’ak. Matéria ne’ebé ami seidauk komprende bele sai oportunidade atu aumenta koñesimentu no komprensaun. Kona-ba rezultadu, ha’u hein desizaun husi STAE,” Ingnasio Marçal Nunes afirma.
Nia promete katak, se konsege pasa iha prosesu seleksaun ne’e, sei kumpre regra no orientasaun STAE nian, no hala’o kna’ar ho responsabilidade no profisionalizmu.
“Se ha’u konsege pasa iha ezame ne’e, ha’u sei kumpre regra STAE nian no hala’o servisu ho di’ak, responsabilidade no profisionalizmu, tuir konfiansa ne’ebé instituisaun fó mai ha’u,” nia promete.
Jornalista: Celestina Teles
Editór: Florencio Miranda Ximenes

