Produsaun hare kulit iha Kovalima sa’e ba tonelada rihun15

KOVALIMA, 16 Novembru 2026 (TATOLI) –Munisípiu Kovalima iha area potensialidade boot iha setór agrikultura, liuliu atu halo produsaun hare kulit. Ho nune’e Iha tinan 2026 produsaun atinje ona tonelada 15.782, 35, ne’ebé hatudu aumentu kompara ho produsaun iha tinan 2025, ne’ebé rejista de’it tonelada 13.000.
“Servisu Agrikultura Munisípiu Kovalima, liuhusi tékniku estensionista sira, rekolla dadus kona-ba produsaun hare kulit ba tinan 2026, ne’ebé atinji hamutuk tonelada 15,782.35. Produsaun ne’e mai husi postu administrativu hotu, maibé maioria kontribuisaun mai husi Suai, Zumalai no Tilomar,” Diretór Servisu Munisípiu Agrikultura Kovalima, Lino Magno, informa ba TATOLI iha Tabakolot.

Munisípiu Kovalima iha potensialidade atu dezenvolve produsaun hare kulit, tanba iha rai agríkola ne’ebé bele uza atu aumenta atividade kultivasaun hare.
Bazeia ba dadus Servisu Agrikultura, área potensial natar iha munisípiu ne’e hamutuk 12,167 hektare. Husi área ne’e, agrikultór sira konsege kultiva natar iha área 4,265.6 ektare, enkuantu área 7,901.5 ektare seidauk uza ka abandona atu halo produsaun hare iha munisipiu Kovalima .
Husi área kultivasaun ne’e, área koileta atinji 4,265.5 ektare, ho produtividade média tonelada 3.7 kada ektare, ne’ebé kontribui ba total produsaun hare kulit tonelada 15,782.35.
Produsaun hare kulit iha tinan 2026 aumenta tonelada 2,782.35 kompara ho tinan 2025, ne’ebé produsaun rejista hamutuk tonelada 13,000.
Aumentu produsaun ne’e mós liga ho esforsu agrikultór sira ne’ebé kontinua aplika métodu kultivasaun oioin, inklui Sistema Intensifikasaun Hare (SRI), ho asisténsia no akompañamentu husi tékniku estensionista sira iha terrenu.
Aleinde ne’e, agrikultór sira kontinua uza sistema kultivasaun konvensionál, ne’ebé komunidade sira koñese ho naran sistema lalina, atu dezenvolve sira-nia atividade to’os natar.
Kona-ba variedade hare, Lino Magno hateten katak, variedade nakroma mak agrikultór sira uza barak liu iha prosesu kultivasaun. Maski iha variedade foun seluk ne’ebé agrikultór sira koko ona, variedade balu ne’e seidauk fó rezultadu produsaun ne’ebé satisfatóriu.
Nune’e, Servisu Agrikultura kontinua fó apoiu tékniku ba agrikultór sira, liuliu liuhusi tékniku estensionista, hodi hadi’a métodu kultivasaun no aumenta produtividade natar iha munisípiu ne’e.
Aumentu produsaun hare kulit ne’e espera bele kontribui ba dezenvolvimentu setór agrikultura no hasa’e disponibilidade hare lokál atu responde ba nesesidade konsumu komunidade iha Munisípiu Kovalima.
Notisia relevante:CLN sosa ona hare kulit tonelada 210 husi agrikultór Kovalima
Jornalista: Celestina Teles
Editór: Florencio Miranda Ximenes

