OEKUSI, 04 Marsu 2025 (TATOLI) – Estudante na’in-104 husi Universidade Orientál Timor-Lorosa’e (UNITAL), liuhusi Departementu Enfermajen hala’o estájiu profisionál, durante fulan-rua iha Ospitál Referál Rejiaun Administrativa Espesiál Oekusi Ambeno (RAEOA).
Biban ne’e, Reitór UNITAL, Claudino Ninas Nabais, espera durante fulan-rua iha ospitál referál Oekusi, dirijente no profisionál saúde sira bele fahe matenek ba estudante sira liuliu prátika tanba teorikamente simu ona husi universidade.
Notísia relevante:Prezidente Autoridade RAEOA deteta problema lima iha Hospital Referénsia Oé-Cusse
“Ami agradese tanba iha kooperasaun di’ak tebes, Sekretáriu Rejionál Saúde ho estrutura tomak bele simu estudante sira ho di’ak, durante fulan-rua iha ne’e sira sei halo akompañamentu no halo tratamentu ba pasiente sira ne’ebé mak baixa hela iha ospitál hodi bele hetan esperiénsia no prátika direitamente ho moras iha ospitál ne’e,” nia dehan iha ámbitu serimónia entrega iha Hospitál Referál Oekusi, ohin.
Reitór UNITAL ne’e entrega responsabilidade ba autoridade ospitál atu jere estudante na’in-104 liuliu halo kalendáriu prátika.
“Ida ne’e mak, objetivu ami lori estudante sira mai iha ne’e entrega ba ospitál Oekusi, espera autoridade saúde liuliu ospitál bele tau-matan hodi transfere sira-nia matenek ba sira molok sira hakat fali ba pasu tuir mai,” nia espera.
Iha fatin hanesan, Sekretáriu Rejionál ba Asuntu Saúde, Luís de Jesus Neno, rekomenda ba estudante sira atu hatudu étika no dixipliña hodi kumpre regra ne’ebé ospitál hatu’ur ona, tanba estudante mak futuru nasaun nian.
“Husu ba estudante sira mai iha ne’e, rai ne’e ita-nian, maske rai enklave mai atu aprende bazea mata-dalan ne’ebé hetan iha universidade, nune’e durante fulan-rua halo peskiza iha ne’e, tenke servisu didi’ak atu hamorin naran estudante no eskola no hamorin naran família, hases-aan husi problema, maibe servisu hamutuk ho respeitu ema no hatudu étika ne’ebé di’ak ba sosiedade,” nia rekomenda.
Entretantu, Segundu Komandante PNTL Oekusi, Inspetór Xefe Polísia, Angelo Quelo fó hanoin ba estudante sira atu hatudu komportamentu di’ak, evita prátika grupu arte marsiál iha komunidade nia le’et.
“Imi mai ho objetivu ida de’it hakarak aprende buat ruma ami hanesan seguransa ami lakohi rona katak ita-bo’ot lori arte marsiál iha ne’e tanba povu iha ne’e moris ho hakmatek, nune’e molok fila-fali ba Díli imi bele lori hela matenek husi Oekusi,” nia apela.
Notísia relevante:Autoridade reativa atendimentu saúde iha Hospital Referál Oé-Cusse
Jornalista: Abílio Elo Nini
Editór: Florencio Miranda Ximenes
