DILI, 05 Marsu 2025 (TATOLI)-Governu liuhusi Ministériu Edukasaun (ME), membru Governu Konstituisionál dasia hamutuk ho Najat Maalla M’Jid (SRSG-VAC) halo lansamentu ba Timor-Leste nia adezaun iha Pathfinding Global Alliance hodi hakotu violénsia hasoru labarik iha auditóriu Kay Rala Xanana, Ministériu Finansa.
Vise-Primeiru Ministru (PM II), Ministru Koordenadór Asuntu Sosiál (MKAS) no Ministru ba Dezenvolvimentu Rurál no Abitasaun Komunitária, Mariano Assanami Sabino, kompromete sei la akontese tan violénsia hasoru labarik sira.
“Oan sira ne’ebé iha ne’e no sira ne’ebé la mai, maibé bainhira imi rona mensajen ida ne’e importante ba imi hotu katak, ami hotu iha ne’e kompromitidu atu labele halo tan violénsia hasoru imi”, Vise-PM Assanami hatete.
Nune’e mós Ministra Edukasaun, Dulce de Jesus Soares, reforsa desde Timor-Leste hetan ninia independénsia sempre fó importánsia boot ba asuntu violénsia kontra labarik maske enfrenta problema iha asuntu ida-ne’e, maibé liuhusi servisu hamutuk sei kontinua lori programa ne’e ba oin.
Iha atividade ne’e, halo mós diseminasaun promesa Timor-Leste nian, enkuadramentu hametin sistema protesaun labarik no workshop vizaun hodi dezenvolve planu asaun kona-ba hakotu violénsia hasoru labarik sira.
Notísia relevante: Reprezentante Espesiál ONU no Primeiru-Ministru diskute solusaun sira ba violasaun direitu
Jornalista : Osória Marques
Editor : Rita Almeida
