KOVALIMA, 10 Marsu 2025 (TATOLI) – Prezidente Autoridade Munisípiu Kovalima Miguel Armada Cardoso akompaña hosi diretór munisipál sira, segunda ne’e, lansa implementasaun Programa merenda eskolár (PME) tinan letivu 2025 iha Eskola Bázika Sentrál (EBC, sigla Portugés), Lontale.
“Ohin, ita hahú lansa ona implementasaun Programa merenda eskolár iha eskolá bázika Sentrál Lontale hamutuk ho diretór servisu munisipál sira”, Miguel Armada Cadoso informa ba jornalista sira hafoin lansa PME, iha EBC Lontale, segunda ne’e.
Ho nune’e Autoridade husu ba grupu Ekipa jestaun programa (EJP) atu implementa PME ne’e tuir matadalan ne’ebé mak vigora ona.
Implementasaun PME, nia orsamentu mai husi Orsamentu jerál estadu (OJE) ne’ebé jere husi Autoridade Kovalima nune’e responsabilidade husi prezidente autoridade munisípiu.
Tan ne’e, autoridade másima munisípiu Kovalima ne’e dehan, diretór hanesan tékniku maibé diretór ne’ebé xave implementa PME mak hanesan diretora servisu edukasaun Kovalima ho diretór sira seluk sai hanesan tékniku atu ezekuta.
Diretór munisipál sira ne’ebé partisipa iha atividade lansamentu PME ne’e mak hanesan reprezentante diretora servisu munisipál Edukasaun Kovalima, diretora finansa, diretór servisu saúde, diretór aprovizionamentu, diretór fiskalizasaun, diretór alimentar, diretór agrikultura no diretór ajénsia planeamentu.
Hafoin implementa PME iha mós ekipa monitorizasaun ne’ebé lidera hosi diretór ajénsia planeamentu hodi halo monitorizasaun iha estabelesimentu ensinu hotu. Iha implementasaun PME bainhira identifika erru PAM sei hatuun despaixu ba diretór fiskalizasaun halo auditória.
“PME implementa tarde ne’ebé ita defini iha PAA 2025. Ita define loron 148, ha’u fiar iha prosesu tomak sei prienxe iha loron sábadu hodi bele kompleta”, nia dehan.
Reprezentante diretór servisu munisipál edukasaun Kovalima, Greogório Ferreira Afonso dehan, munisípiu ne’e foin hala’o implementasaun PME iha EBC Lontale.
“Ha’u hanoin ita iha dadus benefisiáriu ensinu pre-eskolár no ensinu báziku ne’ebé mak benefisiáriu implementa PME referidu ne’ebé ohin hala’o ona lansamentu. Alunu ne’ebé benefísia ba PME 2025 ne’e hamutuk 18,828 ne’ebé kompostu hosi eskola pre-eskolár (EPE) alunu hamutuk 1,920, alunu husi eskola báziku (EB) hamutuk 16,828”, nia hateten.
Realizasaun PME 2025 durante loron efetivu 148, ne’ebé implementa husi ekipa jestaun programa (EJP) 23 ne’ebé kria ona no kada alunu iha direitu ba han sentavu 0,35.
Implementasaun PME tarde nune’e autoridade Kovalima halo esforsu atu atinji loron efetivu 148 alunu sira sei han mós iha loron sábadu nune’e bele komplementa loron efetivu ne’ebé defini ona iha PAA 2025.
Orsamentu PME ba tinan-2025 ba munisípiu Kovalima hamutuk Milliaun $ 1,165,375,68 ne’ebé aloka ba eskola pre-eskolár hamutuk $ 119.347.20 no ba eskola ensinu báziku $ 1,278.029 ba ensinu báziku $ 1,046 28 48.
Fó hanoin fali katak, implementasaun Programa merenda eskolar 2024 hala’o lansamentu iha eskola bázika sentrál Suai loro iha 13 Maiu no iha 2025 implementasaun PME sei lansa iha Eskola Bázika Sentrál Sandalo iha loron 13 Janeiru ne’e.
Jornalista: Celestina Teles
Editór: Rafael Ximenes de A. Belo
