OEKUSI, 11 Marsu 2025 (TATOLI) –Kompañia Ami-Bele Unipesoál Lda, halo ona normalizasaun ba ponte Bitopa, lokaliza iha bairru Hau-Ana, aldeia Buqui, suku Usitasa’e, sub-rejiaun Oésilo no tuir planu husi Diresaun Rejionál Infraestrutura (DRI) sei aposta iha Planu Assaun Annuál (PAA) atu hadi’a iha 2026.
Diretór Diresaun Rejionál Infraestrutura (DRI), Remigío Nuno Sila, informa iha fulan Fevereiru akontese udan-bo’ot rezulta mota tuun hodi estraga ponte Bitopa, difikulta tebes movimentu transporte sira inklui sedimentasaun ameasa taka ponte referidu.
Notísia relevante: IGEADI,I.P sei hasai sedimentasaun iha ponte Bitopa
“Tan ne’e, presiza halo ona normalizasaun, tanba kondisaun ida mak ai bo’ot ida sukaer taka metin arampu nia kuak, entaun bee labele sulin no nakonu ho sedimentasaun rai henek, tan ne’e ita orienta kompañia Ami-Bele tanba sira halo hela reabilitasaun estrada iha Usitasa’e ba Tumin, apoia normaliza ponte Bitopa, agora laiha ona problema iha ponte ne’e rasik,” nia dehan ba jornalista iha Oekusi, ohin.
Tuir loloos ekipa husi Institutu Jestaun Ekipamentu no Apoia Servisu Infraestrutura, Institutu Públiku (IGEADI,I.P), mak halo normalizasaun maibé tanba kondisaun estrada no iha tempu udan estrada ligagaun Oébaha ba Bitopa nakonu ho rai tahu, nune’e DRI husu apoia ba kompañia halo normalizasaun urjente.
“Planu ba futuru mak ne’e, ita fó ona pareser ba Prezidente Autoridade RAEOA atu mellora di’ak liutan ho ponte ne’ebé kualidade atu labele prezudika movimentasaun komunidade sira ita iha planu ona maibé sei haree fila-fali ba orsamentu ita bele hadi’a iha tinan oin mai 2026,” nia promete.
Iha fatin seluk, Xefe suku Usitasa’e, Tomas Ulan Colo, agradese ba Autoridade RAEOA ho kompañia tanba ho inisiativa di’ak bele halo normalizasaun ba ponte ne’e.
“Antes ne’e ha’u rasik mak submete pedidu ba obra públika, husu apoia atu mai halo normalizasaun, ne’ebé ita agradese tanba pedidu ne’ebé ita hato’o responde imediata hodi orienta kompañia ida mai halo normalizasaun, ne’ebé ita espera bele hadia tan iha futuru, tanba ponte ne’e kada tinan sempre fó ameasa no estraga natar komunidade sira kuaze ektare 20,” nia informa.
Notísia relevante:Ponte Bitopa-Noetoko konstrui uza dezeña ponte antiga Oébaha no Bihala
Entretantu, ponte Bitopa konstrui iha 2022 mandatu Autoridade Sesante ho valór gastu hamutuk $406,945.00, Autoridade RAEOA aloka hosi Orsamentu Jerál Estadu (OJE) 2022 nian, ho durasaun servisu fulan-haat.
Ponte Bitopa lokaliza iha aldeia Buqui, suku Usitasa’e, sub-rejiaun Oésilo, no ponte ne’e rasik nia medida naruk metru 64 kompleta ho protesaun moru gabiaun metru 170.
Ponte ne’e rasik durante ne’e fasilita komunidade mai husi sia (9) komposta hosi suku Usitasa’e, Bobometo no Usitaqueno pertense ba sub-rejiaun Oésilo, suku Abani no Malelat sub-rejiaun Pássabe no suku haat seluk pertense sub-rejiaun Nítibe hanesan, Ban-Afi, Lela-Ufe, Usitaku no Bene-Ufe.
Notísia relevante:Autoridade RAEOA inaugura ponte Bitopa fasilita komunidade sub-rejiaun tolu
Jornalista: Abílio Elo Nini
Editór: Florencio Miranda Ximenes
