DILI, 11 Marsu 2025 (TATOLI)–Deputadu Bankada Governu husi Partidu Demokrátiku (PD), Mariano Fernando Xavier ‘Malik’, levanta preokupasaun komunidade liga ho estrada ho kondisaun ladi’ak iha munisípiu Ainaru, nune’e bolu atensaun ba ezekutivu atu tau atensaun.
“Iha ne’e nu’udar reprezentante povu sai hanesan lian povu nian, hakarak espresa preokupasaun komunidade munisípiu Ainaru, hafoin tinan 23 indepedénsia estrada iha munisípiu Ainaru kontinua ho kondisaun ladi’ak, afeta ba asesu transporte públiku entre postu ba postu ba munisípiu, espesialmente iha Ainaru vila,” Reprezentante povu ne’e levanta liuhusi reuniaun plenária Parlamentu Nasionál (PN), tersa ne’e.
Notísia relevante : Governu deside aumenta orsamentu $984.188 ba projetu manutensaun estrada Dili-Ainaro
Situasaun ne’e ezije Governu tau atensaun urjente infraestrutura. Aleinde Governu presiza tau atensaun importante estrada ligasaun Fleixa ho postu Hatubiliku ne’ebé konsidera distinu turístiku ema barak hala’o vizita loroloron, liuliu iha peregrinasaun Nossa Señora Ramelau nomós iha aspeitu agrikultura oinsá aumenta rendimentu komunidade iha área referidu.
“Ho kondisaun estrada la favorável prejudika asesu komunidade bá merkadu,” nia akresenta.
Iha fatin hanesan, Deputadu opozisaun husi Frente Revolusionáriu Indepedente Timor-Leste (FRETILIN), Antonino Bianco, husu atu mellora kondisaun estrada Same no Zumalai bá Kasa no Suai bá Ainaro.
“Iha Jakarta II (Ainaru) nu’udar sítiu istóriku maibé kondisaun estrada ladi’ak, husu Governu atu mellora,” nia hato’o.
Vise-Ministru ba asuntu Parlamentár, Adérito Hugo da Costa, hateten relasiona ho infraestrutura bázika iha kapitál Ainaru no liga Hatubiliku, Hatudu ida-ne’e tama ona prioridade Governu.
“Aproveita oportunidade Governu liuhusi Ministériu Obra Públika iha própriu planu estrada nasionál, munisípiu no nível suku. Antesipamente esklarese progresu pozitivu konstrusaun estrada nível suku liuhusi orsamentu Progama Nasionál Dezenvolvimentu Suku (PNDS) no Governu sentrál liuhusi MOP aguarda orsamentu munisipál responde estrada munisipál hodi kompleta kontinua investimentu obra estrada,” nia akresenta.
Jornalista : Nelson de Sousa
Editora : Julia Chatarina
