Estabelesimentu Embaixada Timor-Leste iha India finaliza ona
DILI, 12 Marsu 2025 (TATOLI)–Enkaregadu Negósiu Embaixada Timor-Leste iha India, Francisco Maukura, hateten prosesu estabelesimentu Embaixada Timor-Leste iha India finaliza ona no hein de’it Prezidente Repúblika atu nomeia timoroan ida sai Embaixadór hodi destaka ba iha ne’ebá.
Notísia Relevante: Fevereiru, finaliza ona prosesu estabelesimentu embaixada TL iha Índia
“Ita-nia Embaixada iha India finaliza ona nia estabelesimentu, ohin hetan ona bensaun hosi Padre Dominikana iha ne’e. Hahú ohin ba oin Embaixada bele funsiona no halo servisu polítika diplomátika ho normál no funsiona 100%,” Maukura hateten ba Agência TATOLI liuhusi WhatsApp (WA), kuarta ne’e.
Maukura dehan, hahú 19 Outubru 2024, nia parte to’o iha India no buka kedan kontaktu ho agência iha ne’ebá hodi buka edifisiu atu harii Embaixada durante fulan haat.
“Iha ne’e la’ós estabelese edifísiu de’it maibé estabelese mós networking ho Governu liuliu Ministériu Relasaun Esterna India nian ba prosedimentu atu estabelese Embaixada. Nune’e mós halo enkontru ho entidade India nian sira seluk, hanesan komunidade business sira-ne’ebé hanesan poténsia investór sira iha futuru. Nune’e, ita hala’o enkontru ho Atctes Bollywood no líder relijozu no kulturál India nian, ne’ebé koñesidu hanesan dalan ida hodi promove Timor-Leste iha India,” Maukura dehan.
Nia hatutan, dezde fulan-Outubru no Novembru 2024, koordena ho investór sira hodi loke eskola médiku iha Timor-Leste atraves UCT ho UNPAZ no konsege ajuda mobiliza estudante indianu 300 mak hili Timor-Leste sai destinasaun foun ba sira hodi hala’o estudu.
Timor-Leste iha poténsia atu aselera kooperasaun bilaterál ho India iha área Informatika (IT) Agrikultura, Saúde, Investimentu no Komérsiu, Infraestrutura, Turizmu no Transporte Aiero.
Francisco Maukura hanesan Enkaregadu Negósiu Embaixada, nia servisu to’o de’it iha finaliza estabelesementu Embaixda no sei fila hikas mai Timor-Leste iha 14 Marsu 2025.
Daudaun ne’e, Estadu Timor-Leste iha hela prosesu atu hili no finaliza nomeasaun ba Embaixadór Timor-Leste nian ba India ho dirasaun: Embassy Demokratika Republika de Timor-Leste Vasant Vihar, Block D1/8, New Delhi, 110057, India.
Jornalista : Hortencio Sanchez
Editór : Cancio Ximenes
