OEKUSI, 13 Marsu 2025 (TATOLI) – Polísia Nasionál Timor-Leste (PNTL) liuhusi Unidade Patrollamentu Fronteira (UPF), kuarta kalan, prende karreta ida ho marka Land cruiser Sáfari, xapa matrikula A21-059 TL, tanba tenta atu hakat ilegalmente liuhusi fronteira mota Noél-Ekat, suku Bobometo, sub-rejiaun Oésilo, Rejiaun Administrativa Espesiál Oekusi Ambeno (RAEOA).
“Karreta ne’e prende iha loron kuarta, 12 Marsu 2025, tuku 21:26 otl, kalan, iha área Noél-Ekat, tanba kondutór halai lakon, kuandu UPF hapara karreta iha Noel-Ekat, ami (UPF) deteta objetu referidu atu sai liu ba rai sorin, maibé husi servisu sekreta UPF akompaña tuituir kuaze semana ida ona, to’o horisehik tenta atu sai ho dalan ilegál mak foin ka’er,” Komandate UPF, Superintendente Polísia Euclides Belo, informa ba Ajénsia TATOLI,I.P via telefonika, ohin.
Notísia relevante:UPF la tolera sidadaun ne’ebé prátika atividade ilegál iha liña fronteira
Hafoin prende, Komandante UPF dehan, halo kedan revista ba dokumentu transporte rua hanesan kartaun rejistu veíkulu ka STNK no dokumentu inspesaun no iha kalan ne’e kedas ekipa UPF lori kedas mai iha komandu kuartél UPF iha Pante Makasar.
“Nia prosesu kontinuasaun, ohin lorokraik ne’e ami entrega ona ba iha Komandu PNTL Oekusi liuhusi sesaun investigasaun atu kontinua prosesa ba Ministériu Públiku, tanba ne’e tama iha kategória lei kontra-bandu,” nia informa.
Notísia relevante:Komandante UPF vizita EBF Mabil-oa hametin amizade entre PNTL ho estudante
Jornalista: Abílio Elo Nini
Editór: Florencio Miranda Ximenes
