OEKUSI, 17 Marsu 2025 (TATOLI) – Tribunál Distritál Oekusi (TDO),segunda ne’e, halo primeiru interrogatóriu ba suspeitu ho inisiál FDC, ne’ebe taa kanek nia-feen kaben ho inisiál FME, iha iha suku Cunha, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Iha interrogatóriu dahuluk ne’e, TDO aplika kedas medika koasaun Prizaun Preventiva ba suspeitu ho inisiál FDC tanba komete krime rua hanesan omísidiu agravadu ne’ebé previstu iha Kódigu penál 139 no Lei Arma Branka.
Notísia relevante:PNTL Oekusi detein ona suspeitu taa nia-feen iha Cunha
Hafoin audénsia ne’e, Advogadu ne’ebé fó asisténsia legál ba suspeitu, Afonso Gomes Fátima, relata katak iha prosesu julgamentu primeiru interrogatóriu, Ministériu Públiku akuza suspeitu FDC ho krime rua hanesan krime omísidiu agravadu ne’ebé previstu iha Kódigu Penál 139 no Lei Arma Branka
Bainhira, Ministériu Públiku le’e akuzasaun ne’e, nia dehan suspeitu sente triste tebes hodi tanis ho mata-been suli maka’as iha sala audiénsia julgamentu laran. Tanba suspeitu ho vítima FME moris hamutuk nu’udar feen no laen tinan barak ona, Daudaun ne’e sira iha ona oan na’in-haat, mane rua no feto rua ho idade sei minoridade hela.
“Julgamentu primeiru interrogatóriu iha indisíu forte katak suspeitu prátika kazu rua, krime omesídiu agravadu ho forma atentada no arma branka, nune’e suspeitu mós konfesa ho onestidade katak nia mak halo asaun ne’e,” nia dehan ba Ajénsia TATOLI, I.P iha Oekusi, ohin.
Tuir nia, haree ba krime rua ne’e tuir prosesu penál Timor-Leste suspeitu sei hetan pena tinan-tolu ba leten no pena tinan 12 to’o 25, tan ne’e suspeitu priénxe duni atu tama prizaun preventiva no daudaun ne’e vítima hala’o hela tratamentu iha Ospitál Referál Oekusi.
“Prizaun preventiva ne’e faze primeiru fulan-neen iha prizaun, kuandu iha komplesidade bele prolonga tan, maibé ne’e kompeténsia iha Ministériu Públiku, nia mak sei halo investigasaun ba ida-ne’e, karik iha fulan neen hotu ona, entaun sei haruka mai fali atu halo ona prosesu julgamentu,” nia dehan.
Entertantu, julgamentu primeiru interrogatóriu ne’e prizide husi Juiz Evangelino Belo, Ministériu Públiku reprezenta husi Prokuradór Mateus Nessi no suspeitu hetan asisténsia legál husi Defensór Públiku, Afonso Gomes Fátima.
Notísia relevante:PNTL detein suspeitu na’in-21 durante selebrasaun Natál
Suspeitu ba kazu omisídiu iha Bene-Ufe kumpre prizaun preventiva
Jornalista: Abílio Elo Nini
Editór: Florencio Miranda Ximenes
