DILI, 18 Marsu 2025 (TATOLI)-Universidade Nasionál Timor Lorosa’e (UNTL) simu apoiu ekipamentu zoom husi Ajénsia Kooperasaun Brazileira (ABC, sigla portugés) hodi fasilita prosesu ensinu ba kursu doutoramentu.
“Sira apoia screen (ekran) boot ida hodi halo estudu online, nune’e aprende tuir zoom”, Reitór UNTL, João Soares Martins, hatete iha Delta Nova, ohin.
Nia dehan, profesór barak fó aula husi Brazil, nune’e ho ekran boot ne’e bele ajuda hodi aprende no halo komunikasaun di’ak liután duke sira komunika liuhosi telefone no WhatsApp.
“Ida-ne’e ajuda tebes prosesu ensinu doutoramentu nian, no ekran ne’e destinadu ba kursu doutoramentu iha área edukasaun”, hatutan Reitór Ensinu Superiór públiku ne’e.
Ekipamentu seluk ne’ebé UNTL simu mak kamera konferénsia ho marka Meetup Logitech, spiker Logitech no Televisaun.
Notísia relevante: Estudante 129 sei hahú programa mestradu no doutoramentu iha UNTL
Jornalista : Osória Marques
Editora : Rita Almeida
