DILI, 19 Marsu 2025 (TATOLI) – Konsellu Ministru autoriza despeza millaun $2,46 ba serbisu komplementár sira iha konstrusaun Unidade Pediatria no Kuidadu Koronáriu Intensivufoun iha Ospital Nasionál Guido Valadares (HNGV, sigla portugés).
Aleinde ne’e fó mós kompeténsia ba Ministra Saúde, Élia dos Reis Amaral, hodi asina alterasaun ba kontratu ezekusaun obra ho empreza ne’ebé responsavel ba projetu ne’e.
“Nesesidade husi alterasaun kontratuál ida-ne’e no ninia despeza adisionál hamosu tanba adaptasaun ba norma estruturál no regulamentár foun, korresaun ba aspetu tékniku ne’ebé identifika ona iha revizaun design nian no implementasaun ba melloria ne’ebé garante efisiénsia no seguransa ne’ebé boot-liu iha infraestrutura ospitalár nian”, refere nota husi Governu.
Dokumentu ne’e esplika katak serbisu komplementár sira ne’e inklui instalasaun ba sistema klimatizasaun ida ne’ebé hamenus risku kontaminasaun, sistema avansadu ida kona-ba tratamentu bee-fo’er hodi utiliza filafali ho seguru no hadi’a izolamentu térmiku no estruturál.
Lembra katak Governu anteriór prevee milaun $9,3 ba konstrusaun obra ne’e ho durasaun tinan rua, husi 2023 to’o 2025, neʼebé ka’er husi empreza China Civil Engineering Construction Corporation (CCECC).
Lansamentu fatuk dahuluk ba edifísiu ho andár lima ne’e halo iha Janeiru 2023.
Notísia relevante: Konstrusaun pediatria no ICCU aloka milaun $9.3 ba durasaun tinan-rua
Jornalista: Arminda Fonseca
Editora: Maria Auxiliadora
