DILI, 21 Marsu 2025 (TATOLI)–Banku Sentrál Timor-Leste (BCTL, sigla portugés) hamutuk ho Universidade Nasionál Timor-Lorosa’e (UNTL), sesta ne’e, asina nota entendimentu ba kooperasaun serbisu atu halo peskiza konjunta iha área ekonomia, finanseira no seluk tan.
Nota entendimentu ne’e asina iha ámbitu lansamentu relatóriu dezempeñu ekonómiku Timor-Leste ba tinan 2024.
“UNTL hanesan instituisaun edukasionál, ba kooperasaun ne’e ami hakarak serbisu hamutuk oinsá halo peskiza hamutuk no partilla esperiénsia ba malu,” Governadór BCTL, Helder Lopes, hato’o iha salaun Ministériu Finansa, Aitarak-laran.
Notísia relevante : Relatóriu BCTL: kresimentu ekonómiku Timor-Leste sa’e ba 4% iha tinan 2024
Aleinde partilla esperiénsia, liuliu komplementa estudante sira-nia teoria ho mundu reál ne’ebé iha, liuliu iha área ekonomia no finansa inklui bele kria oportunidade ba estudante sira atu hala’o prátika ka estájiu iha BCTL.
“Iha programa balun presiza advokasia hamutuk ba públiku no entidade relevante, pur ezemplu atu promove inkluzaun no literasia finanseira,” nia akresenta.
Iha fatin hanesan, Reitór UNTL, João Soares Martins, hateten, akordu ne’e hodi instituisaun rua bele serbisu hamutuk iha área ekonomia no finanseira hanesan halo semináriu, konferénsia, no formasaun avansadu iha área finanseira.
Nune’e mós, halo estudu ne’ebé Banku Sentrál bele finansia tuir sira-nia kapasidade hodi loke oportunidade ba dosente no estudante sira iha interrese atu estuda kona-ba kestaun finanseira no ekonomia.
“Iha mós diskusan BCTL atu loke kursu post-gradusaun iha área finanseira, entaun UNTL prontu atubele sai fatin no Banku Sentrál bele organiza hamutuk kursu ne’e,” nia tenik.
Reitór hateten, durasaun tempu ba implementasaun akordu ne’e parte rua seidauk diskute no sei iha ekipa téknika bele formaliza detallu.
Eventu ne’e, asiste direta husi Primeiru Ministru (PM), Kay Rala Xanana Gusmão, Ministru Ensinu Superiór Siénsia no Kultura (MESSK), José Honório Guterres inklui entidade relevante seluk.
Jornalista : Nelson de Sousa
Editora : Julia Chatarina
