DILI, 21 Marsu 2025 (TATOLI)—Ministériu Solidariedade Sosiál no Inkluzaun (MSSI) ho Fundu Nasoins Unidas nian ba labarik sira (UNICEF, sigla inglés), asina nota entendimentu konaba hametin sistema protesaun ba labarik, liuliu sira ne’ebé vulneravel.
Ministra Verónica das Dores hateten nota entendimentu ne’e atu hametin sistema protesaun ba labarik, ho intervensaun sira hanesan domíniu jurídiku no lejizlativu, domíniu servisu protesaun sosiál, no domíniu servisu ba kapasidade profisionál no seluktan.
“MoU ne’e oinsá atu harii sistema polítika ida, iha kazu ne’ebé labarik sira nunka hetan espozisaun, mezmu mídia sira informa ona mai ita katak labarik sira labele tauk atu hato’o informasaun, liuliu ba labarik vítima violénsia, hanesan violénsia doméstika, violénsia bazeia ba jéneru, no seluktan”, dehan Ministra ba jornalista sira iha Kaikoli, sesta ne’e.
Iha fatin hanesan Reprezentante UNICEF iha Timor Leste, Patrizia Di Giovanni, hatete servisu hamutuk ne’e importante tebes, liu-liu iha siklu dezenvolvimentu labarik nian.
“Apoiu ne’ebé fó maka atu labarik sira hetan sira nia direitu, hanesan husi moris labarik sira nian, no garantia atu hetan nutrisaun adekuadu, no mós protesaun hosi impaktu oioin, atu nune’e labarik sira iha kualidade moris ne’ebé aas. Iha 2025, UNICEF apoia hela finansiamentu ho valór rihun $500”, dehan.
Notísia relevante: MSSI-UNICEF hametin kooperasaun atu implementa lei protesaun ba labarik
Jornalista : Osória Marques
Editora : Rita Almeida
