OEKUSI, 26 Marsu 2025 (TATOLI) – Diresaun Rejionál Terra Propriedade (DRTP) Rejiaun Administrativa Espesiál Oekusi Ambeno (RAEOA) liuhusi Servisu Kadastru, planu halo notifikasaun ba komunidade ne’ebé hela iha área risku ba dezastre naturál.
“Daudaun ita-nia ekipa sira hala’o ona identifikasaun iha terrenu. Hahú kedan identifika área risku sira hanesan lagoa, tasi-ninin no mota-ninin, husi rezultadu identifikasaun ne’e, sei aprezenta relatóriu mai depois mak ita hahú taka notifikasaun,” Diretór DRTP Oekusi, Júlio Coel, iha Oekusi, ohin.
Notísia relevante:DNTP Oé-Cusse rejista kazu disputa rai 56
Iha Orsamentu Jerál Estadu (OJE) 2025, servisu Terra no Propriedade mós prevee orsamentu atu identifika fali plaka toponímia sira-ne’ebé autoridade anteriór monta ona atu halo reabilitasaun, nune’e limita sidadaun sira labele halo uma iha rai abandonadu no konsidera fatin riksu.
“Ita la’ós reabilita de’it kuadru avizu maibé taka mós númerasaun polísia ba uma sira no daudaun ne’e koordena ona ho obra públika atu prepara nia dezeñu atu implementa iha tinan-ne’e,” nia afirma.
Bazea lei númeru 3/2014 (kriasaun RAEOA) iha deliberasaun autoridade númeru 5/2016, 29 Setembru sita pontu tolu maka hanesan, dahuluk, bandu totál aterru natar no bee-lihun iha lagoa, daruak, bandu totál halo konstrusaun ruma la ho autorizasaun husi orgaun kompetente-sira iha RAEOA.
Nune’e mós Governu Sentrál fó atensaun liuhusi lei protesaun sivíl númeru 12/2020, 02 dezembru, hodi kriminaliza komunidade ne’ebé harii uma iha fatin risku ba dezastre naturál, hanesan mota ninin, foho-lolon, tasi ninin no besik lagoa.
“Ita haree komunidade balun kontinua faan sasán iha dalan ninin sa’e liu ba tratoar sira, entaun ita aprosima ona atu do’ok uitoan no karik lakohi koopera mak sei atribui notifikasaun hodi submete ba prosesu seluk bele aplika sansaun multa no prende nia sasán to’o ita rekolla hela iha terrenu, bainhira remata ma itabele hatene dadus ne’e fiksa,” nia informa.
iha fatin hanesan, Xefe Suku Costa, Francisco Colo, informa iha suku Costa mak área ba risku barak mak hanesan, logoa (rawa-rawa), tasi ninin iha parte Lifau nian, tan ne’e presiza Governu fó atensaun ba fatin hirak-ne’e.
“Saida mak polítik Governu halo, ami hanesan autoridade apoia, importante fó benefisíu ba povu, entaun povu iha obrigasaun atu koopera tanba iha nasaun ne’ebé de’it Governu nunka atu estraga nia populasaun maibé polítika ne’e atu proteje ita husi dezastre, ne’ebé meiu ne’ebé Autoridade atu halo ne’e, atu hases ita husi fatin risku ba dezastre,” nia orgullu.
Entretantu, Jornalista TATOLI,I.P, asesu iha dokumentu Orsamentu Jerál Estadu (OJE) 2025, Sekretáriu Rejionál ba Asuntu Terra Propriedade no Rejistu Sivíl Konservatóriu, alokadu horsamentu ba kategória bens no servisu ho montante $634,513 ka okupa 25.66% ho objetivu atu hari kuadru avisu ba fatin publiku no área protezida iha territóriu RAEOA no fornesementu materiál eskritóriu, hola blanku Billete Identidade (BI), blanku kasamentu no seluk-seluk.
Notísia relevante:DNTP Oé-Cusse enkamiña kazu tolu sobre disputa rai ba Terra no Propriedade
Janeiru to’o Marsu, DRTP Oekusi arrekada reseita rihun $11 ba kofre Estadu
Jornalista: Abílio Elo Nini
Editór: Florencio Miranda Ximenes
