DILI, 28 Marsu 2025 (TATOLI)—Membru Komisaun F iha Parlamentu Nasionál (PN) ne’ebé trata asuntu Saúde, Seguransa Sosiál no Igualidade Jéneru, sesta ne’e, hala’o enkontru ho reprezentante husi UN Women hodi diskute akordu kooperasaun serbisu hodi promove asuntu igualidade jéneru iha Timor-Leste.
“Ohin, komisaun realiza enkontru ho UN Women bazeia ba despaisu husi Prezidente Parlamentu ne’ebé fó rekomendasaun mai fali iha Komisaun F atubele halo diskusaun hamutuk ho tékniku husi UN Women hodi haree didi’ak fali ba konteúdu MoU (nota entedimentu) ne’ebé mak hakerek,” Prezidente Prezidente Komisaun F, Maria Gorumali Barreto, hato’o hafoin ramata sorumutu iha resintu PN.
Notísia relevante : Parlamentu Nasionál kontinua fó prioridade ba asuntu jéneru
Akordu kooperasaun ne’e UN Womwn sei fó apoiu ba Parlamentu, liuliu Komisaun F atu haree liubá asuntu feto no orsamentu sensível ba jéneru hanesan feto no labarik feto, ema ho defisiénsia no idozu, ne’ebé balun aloka husi Orsamentu Jerál Estadu (OJE) no planu asaun anuál Governu nian, ne’ebé responde ba asuntu jéneru.
Asuntu jéneru hanesan fó efeitu ba programa barak no hetan atensaun espesiál, ne’ebé mak bele liga iha Komisaun sira hotu no Grupu Feto Parlamentár Timor-Leste (GMPTL).
“Esbozu MoU haruka mai atu implementa tinan rua no ami mós fó rekomendasaun atu hadi’a fali implementasaun durante tinan-haat bazeia ba mandatu husi lejizlatura daneen ninian,” nia akresenta.
Durante sorumutu parte rua diskute esbozu konteúdu iha nota entendimentu ba tempu implementasaun, direitu ba Deputadu sira atu labele limita ko’alia ba públiku no kestaun seluk tan.
“Parte UN Women aseita no sei hadi’a hodi submete esbozu MoU mai fali iha semana oin hodi bele asinatura,” nia tenik.
Jornalista : Nelson de Sousa
Editora : Julia Chatarina
