DILI, 01 Abríl 2025 (TATOLI)–Deputada Bankada Governu husi Kongresu Nasionál Rekonstrusaun Timorense (CNRT), Lúcia Taeki, preokupa ho loja balun ne’ebé hamoos tiha data espiradu iha produtu, nune’e ba husu Autoridade Inspesaun Fiskalizasaun Alimentár, Ekonomia no Sanitária Institutu Públiku (AIFAESA, I.P) atu halo kontrola regulár.
“Iha semana kotuk virál tebes iha rede sosiál kona-ba sasán no hahán liu prazu ona, ne’ebé patraun haruka alin sira ne’ebé serbisu iha loja ne’e hamoos tiha data prazu ne’e ba fali data foun, ne’e akontese iha RAEOA, loja naran Bacara. Xina sira parese halo bebeik ona, se ita la tau atensaun ema barak sei moras,” Deputada ne’e levanta liuhusi reuniaun plenária Parlamentu Nasionál (PN), tersa ne’e.
Biban ne’e, nia apresia ho traballadór ne’ebé serbisu iha loja ne’e rasik tanba fó sai ona ba públiku.
“Loja ne’e mós demais ona mak sira hasai ida-ne’e no parabéns mós AIFAESA ne’ebé tau-atensaun urjentemente hodi ba halo duni asaun iha loja Bacara, se bele karik husu AIFAESA kada fulan haleu Timor-Leste, liuliu loja Xina sira ne’e, tanba loja Xina sira ne’e tama ona iha munisípiu hotu,” nia akresenta.
Notísia relevante : AIFAESA taka provizóriu loja Xineza rua iha Oekusi tanba komete irregularidade
Nia dehan, kestaun ne’e presiza tau-atensaun tanba bainhira ema konsumu produtu liu prazu, maka bele lori impaktu ba saúde.
Iha fatin hanesan, Deputadu CNRT, Gabriel Soares, apresia ho serbisu AIFAESA ne’ebé halo kontrola ba estabelesimentu komersiál sira hodi garante kualidade ai-hán no husu atu kontinua kontrola, nune’e bele hamenus impaktu ba saúde públika.
AIFAESA durante trimestre dahuluk halo ona inspesaun ba fatin hamutuk 247 iha munisípiu Dili no fatin ne’ebé mak hetan infrasaun hamutuk 133 no koima ne’ebé konsege rekolla maka $32.522
Jornalista : Nelson de Sousa
Editora : Julia Chatarina
