BOBONARU, 03 Abríl 2025 (TATOLI)—Sentru Saúde Komunitária Postu Administrativu Atabae, munisípiu Bobonaru konsidera informaun ne’e espalla iha publiku dehan katak postu Saúde Damlaran, suku Aidabaleten taka durante fulan ida ona ne’e la lo’os ka ‘Hoax’ tanba realidade atendimentu saúde la’o normál hela.
Portavós Sentru Saúde Komunitária Atabae, Julvina de Jesús Pinto Soares, konsidera informasaun ne’ebé membru Parlamentu Nasionál levanta iha plenaria iha tersa (01 Abríl 2025) ne’e falsa tanba estoke ai-moruk iha SSK Atabae no postu saúde Damlaran disponivel no sufisiente hela atu halo atendimentu ba nesesidade komunidade nian.
Notísia Relevante: Sentru Saúde Atabae enfrenta problema prinsipál tolu
“Ami hakarak subliña katak realidade hatudu durante ne’e atividade servisu Sentru Saúde Atabae no postu Saúde Damlaran la’o normál hanesan baibain iha oras servisu nomós fora husi oras servisu nian, la’ós dehan Sentru Saúde Atabae maibé mós iha postu saúde Aidabasalala, Rairobo no Nunudoi,” Nia hateten liuhusi konferénsia imprensa ne’ebé Tatoli asesu, kinta ne’e.
Julvina hatutan, durante ne’e SSK Atabae mós halo atendimentu saúde ba pasiente sira husi munisípiu seluk, aleinde ne’e atividade vasinasaun mós la’o normál tuir programa Saúde Integradu ne’ebé realiza dala ida kada-fulan.
Portavós ne’e hateten, dadus hirak ne’e SSK Atabae rekolla husi Postu Saúde haat hanesan no relata diariamente, semanál ho mensalmente ba Diresaun Servisu Munisipál Saúde Munisípiu Bobonaru no Servisu Saúde Nasionál.
“Ikus liu hakarak apela ba komunidade sira hotu atu labele fiar informasaun ne’ebé ke laloos no enkoraja nafatin komunidade iha Sentru Saúde Atabae no postu Saúde sira atu kontinua hakbesik-aan mai simu asisténsia servisu Saúde nia,” nia dehan.
Notísia Relevante: Sentru Saúde Komutária Atabae rejista kazu TB 10 no HIV/AIDS 10
Jornalista : Sergio da Cruz
Editór : Cancio Ximenes
