MSSI sei uniformiza servisu ho Sentru Solidariedade Sosiál Oekusi
OEKUSI, 07 Abríl 2025 (TATOLI)– Ekipa husi Ministériu Solidariedade Sosiál no Inkluzaun (MSSI), liuhusi Servisu Corporativu, tersa ne’e, hala’o sosializasaun kona-ba lejizlasaun servisu finansa ba prosesu administrativu ba enkuadramentu legál sira relasaun ho lei funsaun Públika nian hodi uniformiza servisu entre ministériu ho Sentru Solidariedade Sosiál Rejiaun Administrativa Espesiál Oekusi Ambeno (RAEOA).
Diretór Jerál Servisu Corporativu iha MSSI, Fernando Dos Reis, informa formasaun ne’e hala’o durante loron tolu hanesan refresin training hodi uniformiza servisu sosiál nian ho Governu Sentrál tanba durante tinan 10 liu RAEOA la tutela ba nasionál.
Tanba ne’e, ekipa husi MSSI fasilita sosializasaun ne’e hodi hasa’e koñesimentu ba funsionáriu sira liuliu ba servisu atendimentu sosiál sira tanba kompara ho tinan hirak kotuk Oekusi iha de’it departementu maibé agora ba oin sai ona diresaun ida.
“Atu uniformiza servisu sosiál entre nasionál ho RAEOA ho razaun atu halo modelu ida atu hanesan ho servisu nasionál tanba durante tinan 10-resin, servisu sosiál Oekusi Departementu de’it la’ós diresaun no la tutela ba iha nasionál, entaun foin daudaun ita selebra akordu ida no mós iha autorizasaun husi Funsaun Públika katak husi espansaun ne’e ami iha ona koordenadór jerál iha RAEOA, ne’ebé iha ekivalénsia ho diretór munisipál ida,” nia informa, iha salaun edukasaun Oekusi, ohin.
Diretór Nasionál ne’e, konsidera sosizalizasaun ne’e ne’e, bele fó vantajen ba funsionáriu sira iha Sentru Solidaridade Oekusi, nune’e bele servisu hanesan sentru MSSI nian hanesan iha munisipíu seluk atu tratamentu ne’e hanesan.
“Exemplu atividade ba atendimentu sosiál sira tenke rápidu tan ne’e mak foin daudaun MSSI selebra akordu ho RAEOA nune’e ami bele halo intervensaun direita hanesan atividade sosiál sira hanesan mós ho munisipíu seluk,” nia afirma.
Iha fatin hanesan, Diretór Diresaun Sentru Solidariedade Sosiál Oekusi, Vitór da Paixão, konsidera sosializasaun ne’e importante atu hakbi’it koñesimentu funsionáriu, nune’e bele mellora di’ak liutan servisu sosiál Oekusi nian.
“Atividade ne’e importante ba ami hotu ho funsionáriu sira hodi hasa’e koñesimentu liuliu utilizasaun orsamentu no servisu administrativa iha aprovizionamentu no lojístika, nune’e liuhusi formasaun ne’e atu hasa’e koñesimentu no abilidade atu mellora servisu di’ak liutan,” nia katak.
Entretantu, totál funsionáriu iha Diresaun Sentru Solidariedade Oekusi hamutuk 33 komposta husi permanente na’in-22 no kontratadu na’in-11.
Notísia relevante:MSSI koopera MS tau-matan ba pasiente lepra 23 iha RAEOA
Jornalista: Abílio Elo Nini
Editór: Florencio Miranda Ximenes
