BOBONARU, 11 Abríl 2025 (TATOLI)—Eletrisidade Timor-Leste, Empreza Públika (EDTL, E.P) munisípiu Bobonaru, iha trimestre dahuluk (Janeiru-Marsu) tinan 2025 ne’e, konsege halibur reseitas hamutuk $224,445 husi sentru venda post ne’ebé eziste iha munisípiu ne’e.
Koordenador EDTL, E.P munisípiu Bobonaru, Mario de Jesús, hateten reseita hirak ne’e halibur husi kliente sira-ne’ebé uza eletrisidade ho kategoria doméstika, Sosiál no Komersiál, aleinde ne’e kontribui mós husi kliente ne’e rejistu ba ligasaun foun inklui sosa fiu no asesoria seluk tan.
Notísia Relevante: EDTL Bobonaru aplika multa ba konsumidór-18
“Ami konsege hetan iha fulan janeiru $57,336, mai fali iha fulan-Fevreiru sa’e uitoan iha $58,436 no fulan-Marsu $60,230, nune’e totál fulan tolu ne’e ami rekolla $175,702. Ami mós hetan reseita husi nova ligasaun hamutuk $48,743 ho totál hamutuk mak $224,445,” Mario de Jesús informa ba jornalista sira iha kna’ar fatin, kinta ne’e.
Mario hatutan, reseita hirak ne’e la inklui kliente sira-ne’ebé sosa pulsa husi aplikasaun MOSAN no sosa husi Sentru Venda Postu ne’ebé eziste iha munisípiu seluk.
“Se ita sura hotu ami bele dehan katak sei aas liután ida-ne’e,” Koordenador EDTL, E.P Munisípiu Bobonaru dehan.
Atu kliente sira kumpre dever selu taxa ba estádu, daudaun ne’e EDTL, E.P munisípiu Bobonaru orienta hela tekniku sira halo operasaun tama sai uma atu hakotu koneksaun ilegál sira-ne’ebé labele fó despeza ba Estadu.
Enkuantu, tuir dadus tinan 2024. kliente EDTL, E.P munisípiu Bobonaru ne’ebe eziste iha postu suku 50, postu administrativu neen (6) hamutuk ema na’in-19,312.
Notísia Relevante: EDTL Bobonaro rekolla reseita $470,495.88
Jornalista : Sergio da Cruz
Editór : Cancio Ximenes
