DILI, 15 Abríl 2025 (TATOLI)—Ministériu Solidaridade Sosiál no Konkluzaun (MSSI) serbisu hamutuk ho Institutu Nasionál Seguransa Sosiál (INSS) no Banku Komérsiu Timor-Leste (BNCTL, sigla portugés) komprometidu hodi kontinua mellora atendimentu ba pagamentu pensaun sosiál iha territóriu.
“Pagamentu ba ita-nia idozu ne’ebé labele dezloka ba fatin pagamentu, Institutu Nasionál Seguransa Sosiál (INSS) hamutuk ho MSSI serbisu hela hodi hadi’a serbisu pagamentu ba ita-nia idozu,” Vise-Ministra Solidariedade Sosiál no Inkluzaun, Céu Brites, hateten, durante debate ho Parlamentu Nasionál (PN) kona-ba implementasaun rejime jurídiku seguransa sosiál no funsionamentu fundu rezerva seguransa sosiál.
Notísia relevante : INSS halo pagamentu ba pensaun sosiál iha 17 Marsu
Daudaun ekipa realiza pagamentu ba idozu sira ne’ebé labele dezloka ba fatin pagamentu.
“Banku rasik sei ba idozu sira ne’ebé labele dezloka, sei bá sira-nia uma rasik para bele halo pagamentu nomós ita-nia maluk ho defisiénsia,” nia akresenta.
Goverante ne’e dehan, atu hadi’a sistema pagamentu maka banku enkoraja benefisiáriu atu loke ATM.
“Se ita ba observa pagamentu iha munisípiu barak ita haree katak iha suku balun ne’ebé benefisáriu sira komesa menus, hanesan iha Vemase ita ba benefisiáriu 80 de’it mak ba foti sira-nia osan rasik iha fatin pagamentu,” nia nota.
Vise-Ministra observa, iha Likisá iha benefisiáriu sira simu sira-nia osan liuhusi ATM.
“Entaun ita haree maioria benefisiáriu idozu sira komesa menus ein termu ba foti osan iha fatin pagamentu,” nia katak.
Ho kooperasaun sira, banku mós hahú hadi’a mekanizmu pagamentu liuhusi estabelese ajénsia banku to’o iha fatin suku sira hodi fasilita pagamentu ba idozu sira.
Jornalista : Nelson de Sousa
Editora : Julia Chatarina
