DILI, 15 Abríl 2025 (TATOLI)–Ministériu Edukasaun (ME), tersa ne’e, entrega karreta ho marka gran max pickup ba eskola Ensinu Sekundáriu Tékniku Vokasionál (ESTV) ida iha Natarbora.
“Ohin ba dala rua, iha fulan kotuk liubá ita entrega uluk ona karreta ne’ebé hanesan ba eskola Tékniku Vokasionál Maliana nian. Foin lalais dia 10 ha’u ba vizita hela eskola agrikula Natarbora nian, hodi haree kondisaun infraestrutura, prosesu eskola, no buat hotu la’o di’ak. Tanba ne’e mak ohin ita mai lansa uluk hodi entrega kareta hanesan daruak nian ba eskola Tékniku Vokasionál agrikula ba Natarbora nia”, Sekretáriu Estadu Ensinu Sekundáriu no Tékniku Vokasionál, Domingos Lopes Lemos, dehan iha ME, Vila Verde.
Governante ne’e husu responsavél eskola atu kuidadu no uza ho di’ak tuir nesesidade eskola nian. “Karreta ne’e Governu nian, ne’ebé entrega ona ba eskola maibé nain ba karreta ne’e eskola rasik, signifika jestaun tomak eskola mak halo ba prosesu hotu-hotu iha eskola”, nia dehan.
Kona-ba manutensaun kareta, nia dehan kestaun eskola nian no manutensaun ne’e la presiza governu mak fó osan maibé eskola mak halo jestaun.
“Ida-ne’e sai pilotu ne’ebé oferese uluk lai ba eskola ESTV sira. Espera ho apoiu viatura ne’e prosesu hotu-hotu iha eskola la’o ho di’ak”, dehan.
Direitór eskola Ensinu Sekundáriu Tékniku Vokasionál, agríkola Natarbora, Joaquim da Silva, agradese ba apoiu ida-ne’e. Liuhois apoiu ne’e bele garante nia manutensa no mós kombustivel.
Totál profesór hamutuk na’in-37, kompostu hosi mane 25, feto nain 2, profesór tempu parsiál feto na’in-ida, funsionáriu administrasaun públiku hamutuk na’in-neen, mane na’in-lima, feto nain-ida, funsionáriu kontratadu termu sertu hamutuk na’in-rua, mane na’in-ida, feto na’in-ida, funsionáriu kontratadu feto na’in-ida.
Totál estudante ba anu letivu 2025 hamutuk na’in 125 kompostu hosi primeiru-anu na’in 60, mane na’in 48 feto na’in 12. Segundu-anu hamutuk na’in 26, mane na’in 19, feto na’in 7. Enkuantu terseiru-anu na’in 39, mane na’in 26, no feto na’in 3.
Notísia relevante: Eskola Tékniku Vokasionál Kaloheda Viqueque menus fasilidade prátika
Jornalista : Osória Marques
Editora : Rita Almeida
