KOVALIMA, 16 Abríl 2025 ( TATOLI) – Servisu Munisipál Edukasaun (SME), Kovalima, liuhusi Ekipa Jestaun Programa (EJP) ezekuta ona orsamentu hamutuk rihun $ 146,832.00 hodi implementa Programa merenda eskolár (PME).
Diretora Servisu Munisipál Edukasaun Kovalima, Elda de Fatima esplika katak Edukasaun Kovalima foin ezekuta orsamentu PME hamutuk $146,832.00, tanba foin hahú implementa Programa merenda eskolár iha Marsu ne’e.
“Ezekusaun orsamentu implementa PME hamutuk $146,832.00 fahe ba Eskola Pre-eskolár gasta ona orsamentu $ 15,768.4 no alunu Ensinu Báziku (EB) $131,63.52 han durante loron efetivu 19”, Elda de Fatima, relata dadus ne’e ba TATOLI, iha Santa Rosa, ohin.
Dirijente Edukasaun Kovalima ne’e dehan, alunu ne’ebé mak sai benefisiáriu ba PME ne’ebé Edukasaun Kovalima halo projesaun husi eskola Pre-eskolár (EPE) 1,976 , ensinu Báziku (EB) alunu 16,424 ba maibé alunu atuál ne’ebé mak han ne’e Eskola Pre-eskolár (EPE) 2,231 no Ensinu Báziku (EB) 16,733.
“Númeru benefisiáriu implementa PME diferénsia, tanba molok ne’e ita submete ona dadus projesaun de’it, nune’e iha implementasaun PME ba periódu daruak nian ita la’o tuir dadus atuál ne’ebé iha”, nia esplika.
Implementasaun PME iha 2025 ba periódu dahuluk ,Edukasaun Kovalima seidauk simu keixa ruma husi inan-aman sira kona-ba menu. Implementasaun PME, nia menu uniforme tanba inspesaun sira tuun halo observasaun ai-han fó prióridade ba ai-han lokál ba implementa PME.
Orsamentu Jerál Estadu (OJE) atu implementa Programa merenda eskolár (PME) 2025, aloka mai iha munisípiu Kovalima, hamutuk millaun $ 1,165,367,68 husi orsamentu referidu aloka ba eskola pré-eskolár hamutuk $ 110.520 no ba eskola ensinu báziku $ 1,278.029.
Realizasaun PME 2025 durante loron efetivu 148, ne’ebé implementa husi ekipa jestaun programa (EJP) 23 ne’ebé kria ona no kada alunu iha direitu ba han sentavu 0,35, maibé dadaun foin mak loron implementa loron efetivu 19.
Fó hanoin fali katak, implementasaun Programa merenda eskolar 2024 hala’o lansamentu iha eskola bázika sentral (EBC) Suai loro iha loron 13 Maiu no iha 2025 implementasaun PME lansa iha Eskola Bázika Sentrál (EBC) Lontale iha loron 10 Marsu ne’e.
Jornalista: Celestina Teles
Editór: Rafael Ximenes de A. Belo
