DILI, 17 Abríl 2025 (TATOLI)-Ministériu Edukasaun (ME), sei loke vaga ba antigu profesór kontratadu tinan 2023, ne’ebé ho diploma sekundáriu iha tinan oin.
“Ministériu sei la-taka dalan ba sidadaun hotu-hotu no ita sei haree ba orsamentu, nune’e ita tenke tau orsamentu ba sekundária. Ita tenkeser kria fali vagatura ida-ne’e sei koloka ba parte administrasaun iha eskola sira”, Direitór Nasionál Rekursu Umanu iha Ministériu Edukasaun, João Amaral, hatete ba TATOLI iha nia knaar fatin Vila Verde, kinta ne’e.
Nia dehan, Ministériu Edukasaun tau ona planu sei aplika vaga ba sira. Asuntu ne’e Ministériu Edukasaun nafatin tau konsiderasaun hodi ema hotu-hotu bele hetan direitu maibé nível ensinu iha eskola mak sei la hanesan.
“Tanba ema ne’ebé atu sai profesór nia mínimu ne’e tenke baxarelatu ne’ebé sei hanorin iha eskola Ensinu Báziku sira no lisensiatura ba ensinu sekundáriu sira. Nune’e ba diploma sekundária tenke ba iha administrasaun. Ida-ne’e ami sei tau iha planu depois tinan-oin mai sei halo”, nia dehan.
Totál artigu profesór kontratadu 2023 ne’e hamutuk 1.499 no iha kolega 251 mak deside tuir teste bolsa kandidatu no liu hotu ona no sira agora hanorin hela no seluk mós voluntáriu hela iha eskola privadu sira.
Portavós Ministériu Edukasaun, Filipe Rodrigues, hatete totál dadus husi profesór kontratadu 2023 ne’ebé iha de’it nível sekundáriu hamutuk 271, ho nune’e ministériu sei buka solusaun ba ida-ne’e, bazeia ba regra ne’ebé ministériu edukasaun iha.
Ida-ne’e bazeia ba dekretu-lei 31/2023, 31 Maiu, ministériu refleta kompromisu estratejiku hodi hasa’e kualidade ensinu iha Timor-Leste, espesialmente iha área rekursu umanu iha nivel ensinu sira, ME kontinua hala’o teste bolsa kandidatu profesór iha nivel ensinu sekundáriu jerál no tékniku vokasionál, bazeia ba despasu ministeriál númeru 10/2025, 21 Marsu hodi determina abertura bolsa kandidatu dosenste ensinu sekundáriu jerál, inklui área produtivu programa tékniku vokasionál.
Notísia relevante: ME estende vaga ba profesór ensinu sekundáriu iha munisípiu Dili
Jornalista : Osória Marques
Editora : Rita Almeida
