KOVALIMA, 22 Abríl 2025 (TATOLI) – Rai área potensiál ba natar ektare 1,195 sei abandonadu iha Postu administrativu Zumalai, Munisípiu Kovalima, Diretór Servisu Munisipál Agrikultura Kovalima, Lino Magno informa.
“Iha Postu administrativu Zumalai ita-nia área rai ne’ebé potensiál atu halai natar hamutuk ektare 3077 hodi hasa’e produsaun hare-kulit”, Diretór Lino Magno relata dadus ne’e ba TATOLI, iha Tabakolot, ohin.
Rai ektare 3077 área potensiál halai natar iha Postu administrativu Zumalai, munisípiu Kovalima husi dadus referida rai ektare, 1,882 ektare mak halai natar no rai área potensiál ektare1,195 mak sei abandonadu.
Razaun abandona tanba bee la sufisente atu no númeru agrikultór sira menus ona atu halai natar hodi hasa’e produsaun hare-kulit iha rai laran.
Ho númeru agrikultór menus, polítika Governu liuhusi Servisu Munisipál Agrikuktura Kovalima, iha ona polítika rai ne’ebé abandona uza sai fatin integradu ba komuditi hotu ne’ebé jere husi Governu.
Rai abandonadu sai fatin komuditi hotu, Governu utiliza rai hodi haki’ak animál, ortikultura,,kuda batar, kuda hare rai-maran no foremunggu.
Aleinde ne’e mós parte floresta prepara fini ai-oan atu distribui ba agrikultura sira iha fatin ne’ebé risku ba dezastre naturál hanesan ho tipu rai halai ka erozaun.
Fó hanoin fali katak bazeia ba dadus kultivasaun batar époka ba dahuluk,iha munisìpiu Kovalima tonelada hamutuk 4,119,31 .
Mekanizmu kultivasaun batar époka ba dahuluk liuhusi Prátika agrikultura di’ak (PAD) 142,85 kultivasaun konvensionál 3 264,85 no tradisionál 711,51.
Jornalista: Celestina Teles
Editór: Rafael Ximenes de A. Belo
