KOVALIMA, 24 Abríl 2025 (TATOLI) – Sekretariadu Tékniku Administrasaun Eleitorál (STAE), Kovalima, provizoriamente, seidauk imprimi kartaun eleitorál ho sistema biométriku rihun rua-resin tanba la iha blanko no ribon .
“Hahú loron 11 Fevereiru to’o ohin loron, ita seidauk imprimi Kartaun eleitorál (KE) ho sistema biométriku ba eleitór sira tanba blanko la iha. Maske nune’e, ita nafatin halo atendementu ba sidadaun sira maibé seidauk imprimi hodi hein blanko to’o mak bele imprimi”, Diretór STAE Kovalima, Francisco Gusmão relata ba TATOLI, iha Kampung baru, ohin.
Dirijente STAE Kovalima ne’e klarifika, atu imprimi kartaun eleitorál ho sistema biométriku ba sidadaun sira, importante mak ribon ne’ebé ho nia funsaun atu imprimi kartaun eleitorál biométriku. Bainhira ribon la iha, tékniku STAE labele imprimi kartaun eleitorál ho sistema biométriku ba eleitór sira.
Bazeia ba dadus ne’ebé mak tékniku STAE halo atendementu hahú Fevereiru to’o ohin loron ne’ebé rejista de’it eleitór sira-nia naran iha sistema, eleitór hamutuk rihun rua-resin mak seidauk halo imprimi.
Razaun seidauk halo imprimi tanba la iha blanko no ribon nune’e bainhira tékniku STAE halo atendementu sidadaun ne’ebé atu trata kartaun eleitorál STAE atende la imprimi maibé rejista de’it iha sistema hodi hein blanko no ribon husi nasionál haruka mai iha Kovalima.
“Ita hein blanko ho ribon to’o mak ita foin bele imprimi fali hahú fevereiru mai to’o ohin loron kona-ba problema hirak ne’e husi nasionál mak halo hela prosesu akizisaun materiál ba empreza hodi hein prosesu konkursu públiku”, nia klarifika.
Durante ne’e, STAE kovalima hato’o proposta haruka mai blanko mai hanesan iha tinan kotuk to’o rihun-ida maibé tinan ne’e blanko 500 ne’e depende eleitór sira ne’ebé mak trata sira-nia kartaun.
Bazeia ba dadus, sidadaun ne’ebé mak trata ona kartaun eleitorál ho sistema biométriku hamutuk rihun tolu-resin no daudaun ne’e rihun rua-resin mak tékniku STAE seidauk halo impresaun kartaun eleitorál ho sistema biométriku ba sidadaun sira.
Fó hanoin fali katak iha loron 30 Outobru 2024 ne’e Sekretáriu Estadu Dezenvolvimentu Lokál Mateus dos Santos Tallo lansa resensiamentu eleitorál atualiza baze dadus ho sistema biométriku iha Kovalima.
Jornalista:Celestina Teles
Editór: Rafael Ximenes de A. Belo
