BOBONARU, 25 Abríl 2025 (TATOLI)—Organizasaun Naun Governamentál (ONG) Frontline husi nasaun Japaun, kinta (24 Abríl 2025) foin lalais ne’e, halo lansamentu ba projetu Konstrusaun Sala-Maternidade iha Sentru Saúde Komunitária (SSK) Kakanea, iha suku Lourba, postu administrativu Bobonaru, munisípiu Bobonaru ne’ebé ezekuta husi kompañia lokál AFKEN Unipesoál, Lda.
Notísia Relevante: ONG Frontline apoia programa saúde materna infantil iha Bobonaro
Fasilidade foun ida-ne’e sei konstrui hanesan estensaun ba SSK Lourba, ne’ebé mak Frontline instala ona sistema painél solár iha tinan kotuk. Obra ida-ne’e atu sai hanesan sentru ba saúde inan no labarik nian, ho objetivu atu fornese ambiente ida-ne’ebé seguru liu ba feto isin-rua sira atu partu.
Xefe Sentru Saúde Kakanea, Agapito Berre Sai, hato’o agradesimentu ba povu Japaun liuhusi Embaixada no ONG Frontline iha Timor-Leste ne’ebé konstrui ona Infraestrutura Saúde ne’e, no konstrusaun ne’e sei remata iha Outubru 2025 no Frontline mós sei kontinua servisu hamutuk ho komunidade lokál hodi promove servisu kuidadu saúde ne’ebé seguru no sustentável.
“Ami durante ne’e laiha sala maternidade, ha’u hanoin obra ida-ne’e kuandu hotu bele fasilita ami nia pesoál saúde sira halo servisu hodi diminui kazu mate no moras ba inan isin-rua sira,” Agapito informa ba Agência Tatoli liuhusi telefónika, sesta ne’e.
ONG Frontline hili munisípiu Bobonaru sai área projetu tanba iha tempu udan dalaruma eletrisidade sempre mate to’o semana ida, nune’e la seguru ba inan isin-rua sira atu ba konsulta iha fasilidade saúde no difisíl tebes atu partu.
Enkuantu hahú husi tinan 2024 to’o Marsu 2025, Frontline implementa inisiativa oioin iha área pilotu sira iha munisípiu Bobonaru, ezemplu, formasaun teste ultrasonografia nian fornese ona ba profisionál saúde na’in-12, na’in-10 husi sira-ne’e hetan sertifikasaun nu’udár tékniku ekografia nian ba nivel báziku tuir matadalan nasionál.
Aleinde ne’e, painél solár sira instala ona iha Sentru Saúde Komunitária (CHC) Lourba, hodi asegura servisu médiku sira ho kualidade aas maske durante eletrisidade mate.
Atividade hirak-ne’e hala’o hodi hasa’e kualidade servisu saúde maternu infantil iha munisípiu Bobonaru. Atu habelar liután esforsu hirak-ne’e, Governu Japaun no Frontline deside ona atu kontinua atividade sira-ne’e iha Munisípiu Bobonaru.
Iha faze dahuluk husi projetu foun ne’e, ámbitu atividade sei habelar hodi kobre munisípiu Bobonaru tomak. Ida-ne’e inklui hala’o formasaun kuidadu antenatál ba profisionál saúde sira, promove aula edukasaun materna nian ba inan isin-rua sira, halo sensibilizasaun entre membru komunidade, monitoriza teste ultrasonografia ba inan isin-rua sira no konstrui sala enfermária ba saúde maternu-infantil nian iha CHC Lourba.
Atividade hirak-ne’e sei implementa ho kolaborasaun besik ho ministériu Saúde, Diresaun Servisu Saúde munisípiu Bobonaru, no Departamentu Saúde Bobonaru hodi garante sustentabilidade husi atividade sira-ne’e hafoin projetu ne’e ramata.
Liuhusi projetu ida-ne’e, maizumenus inan isin-rua 2.500 sei hetan asesu ba kuidadu antenatál ne’ebé di’ak-liu, enkuantu membru komunidade liu 20.000 inklui família inan isin-rua sira sei hetan benefísiu husi atividade sira projetu nian.
Projetu ne’e ho objetivu atu fó apoiu ba inan no oan sira-ne’ebé hela iha área rurál. Hasa’e koñesimentu tantu fornesedór kuidadu saúde no membru komunidade sira sei ajuda proteje bebé foin moris no kontribui ba dezenvolvimentu sustentável sistema kuidadu saúde Timor-Leste.
Notísia Relevante:
Jornalista : Sergio da Cruz
Editór : Cancio Ximenes
