KOVALIMA, 30 Abríl 2025 (TATOLI) – Autoridade Munisípiu Kovalima liuhusi Servisu Munisipál administrasaun Rekursu umanu (SMARU) aloka orsamentu $ 441.033 iha esbosu proposta orsamentu Jerál Estadu (OJE) ba iha 2026.
Diretór servisu Munisipál Administrasaun Rekursu Umanu, José Manuel Gonçalves , informa katak, razaun atu halo rekrutamentu ba funsionáriu públiku tanba atu subtitui lista funsionáriu ne’ebé nia naran tama ona iha lista reforma obrigatóriu.
“Esbosu proposta Orsamentu jerál Estadu 2026 ne’e parte rekursu umanu prevee mós orsamentu atu halo rekrutamentu ba funsionáriu públiku tanba bazeia ba lista ita-nia funsionáriu públiku ho rejime jerál na’in-20 mak tama iha lista reforma obrigatóriu”, José Manuel Gonçalves relata ba TATOLI, iha nia servisu fatin AMC, ohin.
Polítika autoridade Kovalima atu halo rekrutamentu funsionáriu públiku hodi subsititui ba funsionáriu públiku sira ne’ebé mak nia naran tama iha lista reforma nune’e tuir planu sei rekruta funsionáriu públiku na’in-140.
Razaun bainhira la iha planu halo rekrutamentu koloka de’it funsionáriu kazuál hodi subtitui funsionáriu públiku ne’ebé tama iha lista reforma obrigatóriu bainhira sira-nia kontratu termina husik hela.
“Ita hatene durante ne’e ita halo kapasitasaun no bainhira sira-nia kontratu termina mak sira para bainhira ita rekurta sira ba iha funsionáriu públiku ita fó kapasitasaun ba funsionáriu dala ida deit”, nia esplika.
Tuir dadus funsionáriu ne’ebé dadaun-ne’e presta sira-nia servisu iha munisípiu Kovalima hamutuk 674. Husi númeru ne’e, funsionáriu públiku 321, ajente administrasaun 45, funsionáriu kazuál asesór na’in tolu iha Gabinete PAM no funsionáriu kazuál na’in-11 Gabinete Apoiu Tékniku PAM no funsionáriu kontratu na’in-245.
Ho dadus rekursu ne’ebé mak iha, funsionáriu sira ne’e presta sira-nia servisu iha hodi fó apoiu iha servisu munisipál 20 no koloka ba to’o iha administrasaun postu administrativu hitu ne’ebé mak pertense ba munisípiu Kovalima.
Bazeia ba dokumentu ne’ebé TATOLI asesu iha esbosu proposta Orsamentu jerál Estadu (OJE) 2026 aloka ba servisu munisipál Administrasaun Rekursu umanu hamutuk $ 567,720.00 fahe ba kategória saláriu no vensimentu $ 531,282.00 no bens servisu $ 36,438.00.
Jornalista:Celestina Teles
Editór: Rafael Ximenes de A. Belo
