Terra no Propriedade Bobonaru identifika ona rai-uma Estadu 230-resin
BOBONARU, 30 Abríl 2025 (TATOLI)—Diresaun Servisu Munisipál Terra Propriedade no Kadastru (DSMTPC, sigla portugés) Autoridade Munisípiu Bobonaru, foin lalais ne’e, halo ona identifikasaun ba rai no uma Estadu hamutuk 230-resin ne’ebé Estadu no Governu Portugés ho Indonézia husik hela hafoin Timor-Leste ukun-aan.
Notísia Relevante: MJ orienta DTP Bobonaro identifika rai no uma Estadu
Xefe Departamentu Diresaun Servisu Munisipál Terra Propriedade no Kadastru (DSMTPC) Munisípiu Bobonaru, Fernando Soares, konfirma proprietáriu abandonadu hirak ne’e identifika iha área Perumahan Ramaskora suku Raifun no Soso, suku Holsa, postu administrativu Maliana.
“Ami halo identifikasaun ne’e iha Ramaskora 154 parte leten seidauk tanba tuir mapa ne’e iha 222. Agora iha Soso hamutuk 80-resin, sira-ne’e na’in-102 mak selu ona taxa,” Fernando Soares hateten ba jornalista iha Maliana, kuarta ne’e.
Nia dehan, tuir planu segunda semana oin, sei kontinua hala’o iha postu administrativu Atabae no sei kobre mós postu administrativu sira seluk hanesan Balibo, Kailaku, Bobonaru no Loloto’e.
“Ami-nia problema mak transporte ne’e. Se lae, ita-nia taxa bele sa’e, iha postu neen (6) ne’e kobre hotu, tinan ida ita bele hatama rihun $150-resin,” nia dehan.
Programa ne’e realiza bazeia ba orientasaun husi Governu no Prezidente Autoridade Munisípiu Bobonaru, Alexandre Pires, hanesan faze preparasaun hasoru Politika Desentralizasaun Administrativa no Poder Lokál, nune’e autoridade munisipál bele regulariza sidadaun ne’ebé okupa rai no uma Estadu hodi selu taxa kada-fulan.
Uma no rai hirak ne’ebé abandona husi Estadu ho Governu Portugés no Governasaun Indonézía, Estadu Timor-Leste mak iha direitu no kompeténsia atu jere no administra bazeia ba lei númeru 1/2003, lei númeru 13/2013 kona-bá titulariza bens movel, dekretu-lei númeru 09/2014 kona-bá arrendamentu.
Diretór Teras Propriedades delegasaun treritoriál Munisípiu Bobonaru, Castro Laco Martins,reforsa durante ne’e arrendatáriu lokál no estranejeiru hamutuk 102 no husi númeru ne’e maiória selu taxa ativu.
Nia haklaken, daudaun ne’e Estadu regulariza ona sidadaun sira-ne’ebé okupa uma no rai Estadu iha merkadu Maliana hodi selu taxa ba Estadu.
“Iha 2021 no 2022 sei akontese, maibé ami hakbesik ba maluk sira-ne’ebé uza proprietáriu Estadu, agora dadauk ami evita ona, bolu sira okupa ne’e mak halo atendimentu ho Esaádu. Iha balun mak sei husu osan iha kotuk-kotuk, maibé ami agora bolu sira para prevene. Tanba ida-ne’e kontra lei. Se ita-boot mak halo kontratu, entaun ida bee ita-boot fó-tutan tenke halo sub-kontratu arrendamentu, maibé propósta ne’e hato’o ba Ministériu Justisa aprova mak foin bele,” nia dehan.
Enkuantu hahú husi -Janeiru to’o Marsu tinan 2025 ne’e , DTP delegasaun territoriál Munisípiu Bobonaru konsege halibur reseita hamutuk $16,996.00, no taxa hirak ne’e kontribui husi arrendatóriu uza Rezidénsia hamutuk 26 no Komérsiu hamutuk 76.
Notísia Relevante: PAM Bobonaro orienta DTP identifika rai no uma Estadu
Jornalista : Sergio da Cruz
Editór : Cancio Ximenes
