DILI, 02 Maiu 2025 TATOLI)-Ministru Ensinu Superiór Siénsia no Kultura (MESSK) hatete sei bolu Reitór Universidade Nasionál Timor Lorosa’e (UNTL) atu klarifika atu irregularidade sira hanesan kobransa ilegál ba estudante foun no asediu seksuál hasoru estudante.
“To’o ohin-loron ha’u la-simu informasaun, maibé iha mídia ha’u haree estudante sira halo konferénsia inprensa, ko’alia kona-ba farda, kona-ba asediu seksuál, ha’u akompaña hela, ha’u hatene katak Reitór sei viajen bá li’ur, nia fila mai ha’u hakarak ko’alia ho estrutura UNTL hodi tau atensaun ba ida-ne’e, husu tanbasa mak sira halo ida-ne’e, pois estudante sira ko’alia ba públika”, Ministru husi MESSK, José Honório da Costa Pereira, hatete iha knaar fatin, sesta ne’e.
Nia husu ba estrutura universidade atu resolve no labele husik asaun sira hanesan ne’e akontese fali. “Ha’u sempre bolu Reitór atu husu tanbasa hahalok sira hanesan ne’e kontinua mosu. Tanba UNTL ne’e tutela mai ministériu, entaun ha’u sei husu tuir, nune’e bainhira Parlamentu Nasionál liuliu Komisaun G husu mai ha’u, ha’u tenke informa ba sira katak prosesu ne’e la’o hanesan ne’e hanesan ne’ebá”.
Membru governu ne’e husu ba dosente sira tenke iha kredibilidade hanesan edukadór. “Profesór ida tenke iha kredibilidade nu’udar profesór ne’ebé di’ak tanba ita eduka ita-nia oan sira, ita-nia joven sira iha ita-nia Nasaun”.
Nia hatutan, MESSK asina akordu ho UN Women no organizasaun internasionál sira ho objetivu trava asediu seksuál.
“Asediu seksuál ne’e hahalok ida ne’ebé la di’ak, Timor oan hotu-hotu, liu-liu ensinu superiór sira tenke iha boa vontade , boa fé, iha étika atu trava asaun sira hanesan ne’e”, afirma.
Nune’e nafatin informa ba estudante sira liu-liu ensinu superiór sira, karik iha atu husi profesór sira hanesan ne’e tenke mai hato’o iha MESSK, se la mai hato’o iha inspetor jerál ministériu nia.
“Maibé ho evidensia kompletu, karik profesór ida kaer estudante ou halo asaun ruma tenke iha foto kompletu, para ita bele bolu no fó atensaun”, katak nia.
Ministru husu ba profesór sira iha universidade respeita estudante sira, no hatudu hahalok nu’udar dosente, nune’e bele eduka timor oan sira ba oin.
Antes ne’e, portavós Fakuldade Medisina Siénsia Saúde, Cancio Freitas, informa iha sira-nia fakuldade ne’e mosu irregularidade oioin hanesan kobransa ilegál, halo asédiu seksuál ba estudante sira no mós viola norma no prinsípiu universidade, valór ne’ebé UNTL opta inklui aproveita pozisaun iha universidade hodi atinje sira-nia interese pesoál.
“Obriga estudante sira atu sukat farda iha alfaiate Felicia tanba tuir informasaun diretór departamentu hetan subornu husi kompañia refere, aktu ida ne’e hatudu katak korupsaun moris ona iha instituisaun públika. diretór departamentu ne’e mós halo asediu seksuál hasoru estudante sira”, tenik.
Notísia relevante: Reitór UNTL konsidera kobransa ne’ebé akontese ilegál
Jornalista : Osória Marques
Editora : Rita Almeida
