DILI, 03 Maiu 2025 (TATOLI)—Embaixadora Portugál iha Timor-Leste, Manuela Bairos, hatete iha komemorasaun loron munciál liberdade imprensa ne’e, embaixadora fó omenajen ba jornalista estranjeiru na’in-rua, Max Stahl no Jill Joliffe, ne’ebé akompaña beibeik kazu Timor-Leste kona-ba libertasaun nasionál hodi haklaken ba mundu tomak.
Notísia Relevante: Jill Jolliffe bele mate maibé espíritu lia-loos sei la mate
“Jornalizmu mak iha ligasaun metin ho asuntu Timor-Leste nian no ami fó omenajen partikulár ba jornalista Max Stahl no Jill Jolliffe ne’ebé akompaña beibeik kauza Timor-Leste nian no informa ba mundu kona-ba kauza ne’e. Presiza mós atu mundu hatene no iha koñesimentu atu nune’e bele apoia Timor nia kauza. Tanba ne’e, ne’e iha jornalista sira-ne’ebé iha ne’e, iha Timór, ne’ebé nu’udar ema estranjeiru, iha ne’e iha Timór atu hakuak kauza ida-ne’e,” Embaixadora Portugál ne’e hateten bainhira sai oradór iha meza redonda ho tema “Jornalismo a causas: o caso de Timor-Leste”, iha Embaixada Portugál, sábadu ne’e.
Entretantu, Provedór Direitu Umanu no Justisa (PDHJ), Virgílio Guterres, hateten loron 3 Maiu komemora liberdade imprensa hodi ema hotu liuliu jornalista sira hanoin hikas jornalista Jill Jolliffe no Max Stahl.
“Loron liberdade imprensa ne’e hanoin hikas jornalista na’in-rua, no loron ida-ne’e sai referénsia ba luta inkansavel katak ema-ne’ebé lahatene kolen, sira na’in-rua sai referénsia ba jornalista Timor. Katak bareira, limitasaun, obstakulu ne’e la’ós problema ba sira na’in-rua maibé sai dezafiu atu prova sira-nia kualidade,” nia dehan.
Tanba, nia dehan, jornalista na’in-rua ne’e hala’o kna’ar jornalizmu nian iha Timor-Leste ne’e, nuinka rona sira na’in-rua nia lamentasaun kona-ba militár impozisaun ba limitasaun hodi limita liberdade maibé sira rua nia esforsu hodi bele hetan sira-nia fonte liuhusi meiu oioin.
“Konta istória kona-ba luta jornalista Jill Jolliffe no Max Stahl nian, istória sakrifísiu no luta ba solidariedade internasionál. Istória luta povu Timor Lorosa’e nian, istória luta jornalista nian, istória sakrifisiu jornalista sira-nian, luta ba solidariedade internasionál, sira na’in-rua ne’e saida de’it mak sira halo ho sira-nia kolega sira seluk, sei kontinua serve ita hanesan padraun ba luta ba liberdade Timor-Leste,” nia hateten.
Oradora Me. Guilhermina Marçal konsidera jornalista nu’udar lian ba sira ne’ebé laiha lian. Jornalista na’in rua nu’udar anunsiante no mós nu’udar kombatente ba libertasaun povu Timor-Leste.
“Ha’u dehan katak jornalista ne’e portavós ba povu nonok ida, ba povu ne’ebé deskoñesidu iha mundu internasionál nia fuan. Tanba ne’e mak ha’u dehan katak jornalista ne’e lian ba sira ne’ebé laiha lian. Haree ba jornalista na’in-rua ne’e, ha’u dehan katak sira na’in-rua nu’udar lokutór no kombatente ba libertasaun povu Timor,” nia dehan.
Tanba ne’e, oradora Maria Domingas Alves fó omenajen ba jornalista sira no liután ba ema estranjeiru sira no husu ba jornalista timoroan sira atu aprende liután.
“Ha’u apela ba ita-nia jornalista sira agora atu aprende barak liután, aprende barak liután, tanba jornalista sira la’ós manán osan ho públika de’it notísia, sein iha velosidade, sein hatene nia kontinuidade,” nia dehan.
Maria Domingas Alves esplika, jornalista sira luta ba demokrasia no direitu umanu, no agora presiza barak liu duké uluk.
Notísia Relevante: Falur: jornalista Max Stahl haklaken timoroan nia luta ba mundu
Jornalista : Osória Marques
Editór : Cancio Ximenes
A
