Primeiru-Ministru enkoraja profesór sira hanorin estudante ho domin
OEKUSI, 05 Maiu 2025 (TATOLI) – Primeiru-Ministru (PM) Kay Rala Xanana Gusmão, akompaña husi Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, sábadu foin lalais, hala’o vizita ba sentru formasaun profesór sira iha bairru Santa Rosa Oekusi.
Hafoin vizita Sentru formasaun ne’e, Primeiru-Ministru, enkoraja profesór sira atu hanorin estudante sira ho domin no labele baku, nune’e bele prepara sira ba futuru ho di’ak.
Notísia relevante:ME lansa Sentru Informasaun Teknolojia iha Oekusi
“Sai Profesór ne’e misaun ida no la’ós tanba osan. Bainhira hanorin di’ak maka alunu sira sei hatutan buat di’ak maibé hanorin la di’ak maka alunu sira sei hatutan buat ne’ebé ladi’ak. Hanorin la’os atu baku labarik sira, maibé tenke hanorin ho domin. Dala ida tan hanorin labele baku. Hanorin ho domin ne’e atu prepara jerasaun tuir mai ho matenek, la’os tanba sai ona mestre mak bá tarde sai sedu no hein manán osan de’it, ne’e labele akontese ha’u husu hanorin sira ho domin,” nia apela.
Xefe Governu esplika bainhira hanorin labarik sira ho domin maka labarik sira sei sai sidadaun di’ak no sei sai sidadaun ne’ebé hadomi rai ne’e. Tan ne’e, husu ba manorin sira ne’ebé tuir hela formasaun iha sentru formasaun ne’e atubele hadomi sira nia profisaun hodi eduka estudante sira ho domin.
“Haluha tiha katak atu sai profesór hodi hetan osan tanba edukasaun misaun boot ida, imi professor iha misaun ida, misaun ne’e atu hato’o ita bo’ot sira nia matenek ba oan sira, ita liu tiha, sira mak sei kontinua dezenvolve rai ne’e, hatudu domin ba labarik sira hodi eduka sira atu sai sidadaun ne’ebé mak di’ak”.
Iha okaziaun ne’e, Primeiru-Minsitru mós vizita sala Téknoloji Informasaun no Komunikasuan (ICT) hodi apela ba funsionáriu sira ne’ebé tuir hela formasaun ICT atu bele aprende didi’ak hodi uza matenek teknolojia iha servisu fatin.
Iha fatin hanesan, Sekretária Rejionál ba Edukasaun no Asuntu Sosiál, Inácia Tamele, introdús ba Primeiru-Ministru katak sentru formasaun ne’e nu’udar departamentu ida husi Diresaun Rejionál Edukasaun hodi fasilita formasaun ba manorin sira no mós funsionáriu hotu iha Oekusi inklui estudante sira.
“Agradese no haksolok tebes tanba Primeiru-Ministru nia-vizita sentru formasaun ne’e. Fatin ida ne’e ami fó formasaun ba manorin sira, sala ida ba formasaun komputadór ba funsionáriu sira no sala ida ami oferese ba maluk defisiensia sira hodi hala’o sira nia servisu, no sentru formasaun ne’e la’ós ba profesór sira de’it, maibé estudante no funsionáriu sira,”nia orgullu.
Notísia relevante:Xefe Estadu observa projetu sentru formasaun profesór iha Pante Makasar
Jornalista: Abílio Elo Nini
Editór: Florencio Miranda Ximenes
