SJRO realiza desportu atletizmu infantil iha Oekusi
OEKUSI, 06 Maiu 2025 (TATOLI)– Sentru Juventude Rejiaun Oekusi (SJRO), tersa ne’e, realiza atividade desportu atletizmu infantil, ba estudante sira mai husi Ensinu Báziku Sentrál (EBC), Ensinu Bázika Filiál (EBF) no Sentru Formasaun Aprendizajen Eskolar (CAFÉ), nune’e bele selesiona atleta sira ba futuru bele reprezenta Oekusi bá kompete iha nivél nasionál.
Xefe Departementu Sentru Juventude Rejiaun Oekusi, Dionisio Taek, agradese Diresaun Rejonál Edukasaun, tanba bele indika eskola neen hodi partisipa iha atividade atletizmu ne’e.
“Modalidade desportiva hotu atu hahú tenke liuhusi atletizmu ne’e entaun atividade ne’e sei prátika mós oinsá halai, haksoit no seluk tan, tan ne’e ha’u husu estudante sira partisipa ho di’ak, nune’e bele sai fini di’ak nu’udar atleta atletizmu di’ak iha Oekusi, iha futuru bele reprezenta Oekusi kompete iha nivél nasionál, ida ne’e mak objetivu realiza atividade atletizmu no ami agradese ba profesór sira liuliu edukasaun tanba bele indika eskola neen mai partisipa iha atividade ne’e,” nia dehan.
Notísia relevante:SJRO realiza formasaun ‘relasaun saudável’ movita joven hadok-aan hosi moras
Iha fatin hanesan, Diretór Diresaun Rejionál Edukasaun Oekusi, Vincencio Cono, konsidera atividade atletizmu importante, tanba integra ona iha kurríkulu ensinu báziku.
“Atividade ne’e inisiativa ne’ebé mak tau ona iha prátika, durante ne’e iha kurríkulu ensinu báziku, sira idak-idak Teoria de’it, dalaruma iha prátika iha eskola rasik, maibé oinsa sukat sira-nia kapasidade mak ohin loron ita hamutuk ho eskola neen, hahú interpreta ona kurrikulu ensinu báziku atu ita hamosu atleta sira foun liuhusi atividade atletizmu ne’e, ne’ebé agradese tebes tanba husi parte juvenude mós akompaña atividade ne’e ho di’ak,” nia hateten.
Entretantu, eskola neen ne’ebé partisipa mak hanesan, eskola CAFE, EBC Palaban, EBC Boboloa, EBF 28 Agostu Santa Roza, EBC no EBF Santo António Oekusi.
Notísia relevante:RAEOA reativa Kopa ZEESM promove talenta foinsa’e sira
Jornalista: Abílio Elo Nini
Editór: Florencio Miranda Ximenes
