BOBONARU, 07 Maiu 2025 (TATOLI)—Vise Prezidente Konsellu Munisipál Kombatentes Libertasaun Nasionál (CMCLN) Munisípiu Bobonaru, Lucio Dinis Marques ‘Onsar’, hateten Komandante Dudu mak halakan lilin rezistensia iha rejiaun IV.
Notisia Relevante: Adeus!: Komandante Dudu nia istória hakerek hela iha “Rai-hun mutin” no “Rai nakaras”
Tanba, nia haktuir, iha 1991 Saudozu Ernesto Fernandes ‘Dudu’simu kilat no orientasaun husi Komandante Ein-Xefe (FALINTÍL), Kay Rala Xanana Gusmão, hodi reorganiza FALINTI rejiaun IV atu kontinua halo funu kontra forsa Indonézía.
“Komandante Dudu mak komanda operasaun gerilla iha rejiaun IV no iha momentu ne’ebá loke dalan ba kuadru rezisténsia sira hanesan komandante Nino Konis Santana, hamutuk ho José Agostinho Sequeira ‘Somoxo’, Agusto Tara, Samba Sembilan, Sahe, Venancio Verras, Roke, Deker Hakiak, Leo-Balu no sira seluk tan mak forma rejiaun IV iha fronteira Norte no Súl hodi halakan fali lilin baze rezisténsia armada no klandestina atu kontinua luta ba ukun-aan,” nia dehan ba jornalista sira iha nia kna’ar fatin, kuarta ne’e.
Komandante Dudu nia esforsu tomak mak harii rejiaun IV norte ho súl, no tau fundasaun iha ne’ebá, reorganiza rejiaun IV norte súl ne’e hamutuk hodi bele reforsa forsa ukun rasik-aan ne’e, hodi avansa ba oin, joven sira barak liu, balun ba ai-laran no balu fila-fali tanba rezisténsia armada sira iha, organizadu husi katuas Dudu.
Komandante Dudu mak loke dalan ba Komandante Konis Santana, maun sekretáriu rejiaun IV Somoxo sira hotu barak hamutuk ho membru FALINTIL sira.
Mezmu momentu ne’ebá FALINTIL enfrenta hela ofensiva boot husi forsa Indonézia, Lucio Dinis Marques Onsar, haklaken Komandante Dudu hamutuk ho kuadru rezisténsia armada no klandestina ho membru sira kontinua halo operasaun gerrilla atu fó esperansa ba povu hodi luta to’o hetan ukun rasik-aan.
Kombatente Lucio Dinis Marques ‘Onsar’ triste no sente lakon figura importante ida iha istória rezisténsia Timor-Leste nia.
“Se nia la hamriik iha fatin ne’ebá, rejiaun IV ne’e parese ke iha duni maibé saida uitoan, tanba nia hamrik ne’e mak Konis Santana hodi mai, Somoxo mós mai ho tan sira seluk forma rejiaun IV, hodi halibur ita-nia forsa sira iha fronteira. Ne’e mak funu ne’e sei konta ho ita fronteira, se karik momentu la forma rejiaun funu ne’e konta halo nusa,” nia hateten.
Tuir planu, estrutura CMCLN munisípiu Bobonaru hamutuk ho kombatente armada no klandestina sira, kinta (08/05) aban ne’e, sira sei dezloka ba Munisípiu Ermera hodi presta omenajen ba líder forsa rezisténsia rejiaun IV ne’e.
Notísia Relevante:Komandu F-FDTL presta omenajen ba Saudozu Ernesto Fernandes “Dudu”
Jornalista : Sergio da Cruz
Editór : Cancio Ximenes
