SMAS presiza verifika dadus feto vulneravel ne’ebé atu apoia

KOVALIMA, 07 Maiu (2025) – Autoridade Munisípiu (AM) Kovalima liuhusi Servisu Munisipál Asaun Sosiál (SMAS) presiza halo verfikasaun dadus iha terrenu ba feto vulneravel ne’ebé mak atu fó apoiu osan $ 200.
Diretór Servisu Munisipál Asaun Sosiál (SMAS), Clementino Bere dehan, razaun presiza halo verifikasaun iha terrenu dadus ne’ebé mak autoridade postu Zumalai submete ho intensaun atu hatene loloos feto vulneravel sira nia kondisaun.
“Osan $ 200 ne’ebé mak ami Servisu Munisipál Asaun Sosiál (SMAS) fó apoiu ne’e hanesan fasilita feto vulneravel sira atu sosa sira-nia oan nia materiál eskola maibé ami entrega ba ne’ebé la iha kbiit atu buka osan”, Clementino Bere informa ba TATOLI, iha Bairru Costa, ohin.
Bazeia ba Planu asaun anuál (PAA) ne’ebé mak husi servisu munisipál asaun sosiál, kada feto vulneravel fó apoiu osan $ 200 nune’e ba feto vulneravel 21 iha Zumalai ne’e ho nia orsamentu hamutuk $ 4,200.
“Ami deside kada família $ 200 ne’ebé iha 2025 sei fó apoiu iha postu administrativu Zumalai mai husi suku ualu, maibé dadus ne’ebé mak líder suku sira entrega ne’e, ami sei tuun ba terrenu atu halo verifikasaun atu konfirma dadus referidu”, nia dehan.
Dirijente ne’e dehan, dadus feto vulneravel 21 ne’ebé mak líder suku submete ba Servisu munisipál asaun sosiál seidauk halo entrevista direta tanba haree ba daudaun ne’e udan no la iha transporte, maibé sei hein bainhira haree ba udan para bele halo ona entrevista.
“Hafoin halo entrevista ba feto velneravel ne’e ami husi asaun sosiál mak sei ba entrega direta osan $ 200 ne’e ba feto velneravel bazeia ba dadus ne’ebé mak submete hosi líder lokál sira maibé ami sei tuun ba terrenu atu halo entrevista ho sira”, nia informa.
Bazeia ba planu servisu munisipál fó apoiu osan ba feto vulneravel ba postu administrativu hitu maibé apoiu ho fazeadamente tanba kestaun haree ba orsamentu ne’ebé iha 2024 ne’e fó apoiu iha postu Suai hamutuk 12 no iha 2025 apoiu ba na’in-21 iha Zumalai.
Tuir planu iha 2026 ne’e sei fó apoiu osan $ 200 ba feto vulneravel iha Postu administrativu Fatumea, Munisípiu Kovalima.
Governu sentrál aloka OJE 2025 mai Kovalima hamutuk, 8,293.634 husi orsamentu ne’e aloka ba Servisu munisipál Asaun Sosiál (SMAS) hamutuk $ 153.497.00. hodi finansia programa no sub programa iha Planu asaun anuál.
Enkuantu iha esbosu proposta orsamente jerál Estadu 2026 ne’e, Servisu Munisipál asaun sosiál prevee tan orsamentu hamutuk $ 546,222 sei fahe ba saláriu no vensimentu $85,632, bens servisu $50,490, transferénsia Públika $ 63,200 no kapitál menór $346.900.
Jornalista:Celestina Teles
Editór: Rafael Ximenes de A. Belo

