PA RAEOA promete harii mini prizaun iha Oekusi
OEKUSI, 09 Maiu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, promete harii mini prizaun ida iha Oekusi, hodi fasilita sidadaun hotu bele vizita família iha komarka ho distánsia besik.
Prezidente Autoridade ne’e promete iha ámbitu seremónia divulgasaun ba lei sira husi Ministériu Justisa iha Otél Ambeno Oekusi, ohin.
“Ita analiza situasaun iha Oekusi haree katak, sei falta buat barak adminitrasaun justisa atu la’o ho di’ak, ha’u rona komplain husi ema sira-ne’ebé servisu atu hala’o lei no ordén, exemplu bainhira ita ka’er dadus ruma, oinsa mak lori bá Dili tanba ita-nia kadeia iha Oekusi laiha, tan ne’e, semana oin kedan, ami sei buka rai ida atu halo prizaun ida naton de’it, atu bele funsiona normálmente hanesan iha rai bo’ot,” dehan Rogério Lobato.
Tuir nia, Ministériu Justisa mós preokupa kona-ba infraestrutura iha setór justisa, Oekusi iha ona tribunál, maibé dalaruma tenki iha fatin di’ak ba prokuradór, tanba nia mak defensór legalidade demokrátika, no reprezenta Estadu iha konflitu sira-ne’ebé enkamiña ba iha tribunál.
“Ami mós ei haree ida-ne’e, no ami sei fó atensaun tomak atu hadi’a,” nia informa.
Liga ho polítika ne’e, Ministru Justisa, Sérgio Hornai, agradese ba Autoridade RAEOA nia sabedória, hodi fó nia impotansia atu apoia setór justisa iha Oekusi.
“Ita agradese tanba Prezidente Autoridade iha vizaun di’ak, oinsa tulun setór justisa iha Oekusi, tanba bele providénsia fatin ida, atu harii prizaun ida, nune’e bele sai fatin detensaun, entaun ida ne’e nesesidade ida, ita tenki hakonu no apoia, atu-bele kontribui hadi’a ita-nia setór justisa,” nia orgullu.
Notísia relevante:Abitante Oésilo husu MJ harii prizaun iha Oekusi
Jornalista: Abílio Elo Nini
Editór: Florencio Miranda Ximenes
