Traballadór lokál halo asaun greve hodi ezije direitu ba empreza BMS
BOBONARU, 12 Maiu 2025 (TATOLI)—Traballadór lokál sira-ne’ebé servisu iha projetu reabilitasaun estrada Maliana villa pakote I, segunda ne’e, hala’o asaun greve hodi ezije sira-nia direitu ba empreza Internasionál Bina Mitra Indohsejahtera (BMS) tanba halo pagamentu saláriu tarde.
Notísia Relevante: PAM Bobonaro husu empreza HK-BMS ezekuta projetu estrada Maliana ho kualidade
Trablladór Manuel de Fátima, hateten oráriu pagamentu kada fulan ne’e akontese iha kada loron 10, maibé to’o agora empreza seidauk kumpre hodi selu traballadór sira-nia direitu.
“Horbainhira sira promete dehan atu selu ami-nia saláriu ho over time nia. Horibainruak sira promete tan dehan sesta agora simu ona, até ohin segunda ami nunka rona buat id. Ne’e mak ohin ami hala’o asaun ida ne’e, asaun ne’e la’ós brutalizmu maibé ami hakarak mogok de’it hodi hein de’it ami nia-saláriu. Ami durante ne’e kumpre regra tama servisu tuku 07h00, depois tuku 07h30 ne’e ami apel. Ami kumpre regra, maibé ami-nia saláriu sira la kumpre, ida-ne’e mak ohin ami halao asaun mogok,” Nia informa ba jornalista sira iha akampañentu empreza BMS Koléjiu Maliana.
Motorista Manuel hatutan, sira deside greve tanba kada fulan empreza BMS sempre halo pagamentu atrazu no to’o agora traballadór lokál sira seidauk simu osan oras estra ka ‘Lembur’ durante fulan neen (6) nian.
“Fulan-fulan ami traballadór ne’e halo mogok mak sira foin selu ami-nia saláriu. Se ami la halo mogok saláriu ne’e ami bele simu to’o tangal 25 ou 26, nia atu tama fulan rua nian mak ami foin simu fulan ida nian. Lei traballadór Timor-Leste nian, ita simu osan iha loron 26, 27 ou 28 kada fulan maibé ami-nian dalaruma to’o tanggal 10 liután mós iha. Ne’e saláriu, ami-nia lembur nia mós seidauk foti hotu,” nia hateten.
Aleinde ne’e, trablladór lokál Afonso Mali Loe reforsa, asaun greve ne’e sei kontinua la’o to’o hetan sira-nia direitu.
“Ohin, ami hateten se sesta mak sira la selu, entaun servisu ami sei la kontinua, ami sei mogok, ami simu tia mak foin servisu. Tanba sira la’ós foin mak halo, dalabarak tiha ona, ne’ebé ohin ami sira mai servisu ne’e, la’ós mai buka rame, tanba osan mak ami mai. Ezemplu, sira tarde atu tama ba fulan rua, entaun osan ida ami simu ne’e ba taka hotu deve, feen ho oan uza saida,” nia hateten.
Traballadór ne’e rekomenda ba Governu liuliu instituisaun relevante liu Inspesaun Jerál de Traballu atu halo aproximasaun ho empreza BMS hodi solusiona problema ne’e.
“Lei traballu Timor nia ne’e tenke fó sai, saláriu traballadór nia standar iha ne’ebé, simu iha tanggal hira, tama iha fulan klaran hanesan ne’e selu halo nusa, ne’e para ami hotu bele hatene. Se lae, ami la mogok sira bele dada to’o fulan rua resin mós sei la simu osan, tanba ami-nia over time nian mós to’o agora sei la simu,” nia dehan.
Jerente Projetu iha empreza Internasionál Bina Mitra Indohsejahtera (BMS), Ary, deklara katak prosesu hotu la’o ona no hein de’it halo pagamentu iha sesta (16 Maiu 2-25) ho razaun banku iha Indonézia taka tanba loron tersa (12/05) no kuarta (13/05) ne’e loron feriadu nasionál.
Ary klarifika, problema ne’e la’ós ba de’it traballadór timoroan sira maibé to’o agora traballadór estranjeiru sira mós seidauk simu direitu ba fulan-Maiu nian.
Kona-ba informasaun empreza BMS kada fulan sempre selu saláriu tarde, Ary lakohi komenta tanba foin mai asume kna’ar nu’udar jerente projetu.
Tuir dadus ne’ebé Tatoli asesu iha terrenu, traballadór lokál ne’ebé servisu iha empreza ne’e hamutuk 100-resin ho pozisaun hanesan motorista, operadór mákina pezadu no traballadór baibain ne’ebé koñesidu ho naran ‘Buru-Kasar’ no seluk tan.
Notísia Relevante: IJT identifika kauza husi problema entre komunidade ho Hutama Karya
Jornalista : Sergio da Cruz
Editór : Cancio Ximenes
