BOBONARU, 23 Maiu 2025 (TATOLI)—Governu liuhusi Sekretáriu Estádu Dezenvolvimentu Lokál, Mateus Wilfredos dos Santos Tallo, sesta ne’e, hamutuk ho ekipa Programa Nasionál Dezenvolvimentu Suku (PNDS) autoridade postu administrativu Bobonaru no líder komunitária, halo vizita lokál ba projetu reabilitasaun estrada iha suku Male-Ubu ne’ebé paradu hela.
Notísia Relevante: Abitante Kolimau-Maleubu preokupa kondisaun estrada bá kapitál Munisípiu
Membru Governu ne’e orientá Sekretariadu Apoiu PNDS Munisípiu atu halo esforsu hodi finaliza obra ne’e, tanba komunidade presiza tebes atu asesu Estrada, tanba ne’e presiza finaliza obra ne’e tanba daudaun ne’e orsamentu ba projetu sei iha hela konta suku no seidauk fila ba kofre Estadu.
“Imi halo karta ba kedas ha’u, segunda (26 Maiu) ne’e, xefe suku, administradór postu ho Diretór PNDS bolu fornesedór ba hasoru Prezidente Autoridade depois halo karta justifikasaun. Ha’u haruka instrusaun tun mai para imi halo pagamentu ba fornesedór semana oin, para sira hatun fali sasán kontinua tama ona bai’loron ne’e para halo lalais tiha, nune’e fulan-Jullu ho Agostu finaliza ona, tanba povu presiza tebes Estrada,” Nia hateten iha terrenu
Nia hateten, obra ne’e implementa tarde tanba projetu ne’e nu’udár projetu adisionál ninia tranferénsia orsamentu ikus hafoin projetu regulár.
Aleinde ne’e, sekretáriu Estadu mós rekoñese obra ne’e la’o atraza tanba implementa iha fulan-Novembru tanba kondisaun klima la permite fornesedór mobiliza materiál lokál no fabrikadu.
“Iha Novembru-Dezembru udan entaun iha kampu ka terrenu ida hanesan ne’e, projetu ita bele halo fulan ida ne’e só ita mil;agre de’it. Ne’ebé, ita presiza finaliza tiha para komunidade bele asesu ba-mai hodi lori sira-nia sasán produtu lokál ba merkadu,” nia hateten.
Diretór sekretariadu apoia PNDS Munisípiu Bobonaru, Rosario Mali, justifika katak to’o agora projetu ne’e paradu tanba sistema levantamentu orsamentu taka iha fulan-Dezembru tinan 2024 tinan kotuk.
Diretór ne’e afirma, PNDS Munisípiu Bobonaru prontu ezekuta orientasaun husi Governu hodi finaliza obra ne’e.
“Ita iha ne’e preparadu, planu sira-ne’e iha hotu ona, hein de’it ministru hatun despaixu orientasaun mai dehan ezekuta ne’e, loron ida de’it ami foti kedas osan halo pagamentu. Durante ne’e, ami hein de’it orientasaun husi Governu,” nia dehan.
Tuir dadus husi PNDS Munisípiu Bobonaru ne’e hatudu katak totál orsamentu ne’ebé fornesedór gasta ba obra ne’e hamutuk rihun $23-resin no obra ne’e atinje ona 20%-resin ho distánsia metru 200-resin.
Enkuantu reablitasaun estrada ne’e ho orsamentu hamutuk $66,898,23 ho durasaun kontratu fulan haat.
Notísia Relevante: Autoridade Bobonaro propoin millaun $7-resin ba OJE 2025
Jornalista : Sergio da Cruz
Editór : Cancio Ximenes
