BOBONARU,08 Abríl 2025 (TATOLI)- Abitante sira no líder komunitária iha suku Kolimau no Suku Maleubu,Postu Administrativu Bobonaru, Munisípiu Bobonaru, husu ba Ministru Obra Públika (MOP) atu tau prioridade iha planu orsamentu tinan 2026 hodi bele hadi’ak estrada liga husi suku bá kapitál postu administrativu to’o kapitál Munisípiutanba kondisaun fiziku atuál a’at grave.
Komunidade sira hato’o ezijensia ne’e tanba iha fulan-Fevereiru ne’e, Administradór Postu Administrativu Bobonaru,Tomás Henriques,submete direitamente proposta ba Ministru ObrasPúblika, atu tau iha konsiderasaun hodi rezolve.
Notísia Relevante:Estrada diresaun Maliana-Bobonaru iha fatin tolu ameasadu kotu
“Ami povu nia kontente mak ahi-eletrisidade,estrada no bee-moos,maibé to’o agora ami nia estrada ne’e sei a’at”, abitante suku Kolimau,Joana Soares Mau Siga,informa ba Jornalista sira,iha sede suku Kolimau,tersa ne’e
Iha fatin hanesan, Xefe suku Kolimau,Teotonio de Carvalho Marques, dehan kondisaun estrada la di’ak ne’e hahú kedas husi kapitál Maliana ba to’o suku Kolimau Fronteira ho postu administrativu Átsabe, Munisípiu Ermera no suku Karabau baliza ho postu administrativu Zumalai, Munisípiu Kovalima.
Ho kondisaun ne’e, Autoridade ne’e husu ba governu atu seriu rezolve ho emerjensia tanba komunidade suku 18 iha postu administrativu Bobonaro no suku (7) iha postu administrativu Loloto’e inklui suku ha’at iha postu administrativu Maliana sempre preokupa.
Aleinde ne’e, Xefe suku Male-Ubu, Quintiliano Barros Fernandes, reforsa estrada sai preukupasaun bo’ot ba komunidade sira durante tinan barak ona.
Quintiliano konfirma xefe suku no Autoridade postu submete bebeik ona proposta ba parte kompetente, maibé to’o agora seidauk iha resposta pozitivu husi governu atu rezolve.
“Ami nia estrada ne’e grave tebes tanba iha tempu udan ne’e bee mak nakonu iha estrada hodi afeta ba movimentasaun ema no transporte publiku husi kapitál Maliana mai Bobonaru,” nia afirma.
Ho kondisaun estrada ne’e fó impaktu ba agrikultór labele lori produtu lokál ba merkadu iha postu administrativu Bobonaru liuliu kapitál Maliana no fó impaktu maka’as ba komunidade atu ba fasilidade saúde.
“Se ema ruma ne’ebé presiza halo tratamentu Saúde ne’ebé urjente ne’e labele hetan salvasaun tanba kondisaun estrada la di’ak”, nia preokupa.
Tuir observasaun Jornalista TATOLI,I.P iha terrenu,tersa ne’e, nota katak estrada liga husi suku Kolimau ba suku Male-Ubu no Tebabui to’o postu Administrativu Bobonaru no kapitál Maliana nakonu ho fatuk, tahu no bee-nalihun hodi difikulta movimentasaun transporte no ema.
Notísia Relevante:Prezidente Repúblika ‘sasin’ ba promesa MOP hadi’a estrada Bobonaro-Lolotoe
Jornalista: Sergio da Cruz
Editór: Florencio Miranda Ximenes
