PR Horta: Arnolfo Teves la elejível atu azilu polítiku iha Timor-Leste
DILI, 27 Maiu 2025 (TATOLI)—Prezidente Repúblika, José Ramos Horta, hateten sidadaun Filipino Arnolfo Teves Jr. la elejível atu azilu polítiku iha Timor-Leste.
Notísia Relevante: Autoridade seguransa kaptura ona Arnolfo Teves no ohin sei deporta ba nia rai orijen
“La estradita ona sidadaun ne’e, maibé la elijível atu azilu polítiku, bainhira mandadu husi INTERPOL solusita husi autoridade Filipina, tanba nia halo buat balun la loos iha Estadu ne’ebá ne’e mak pedidu husi autoridade Filipina liuhusi INTERPOL atu kaptura nia,” Horta hateten ba jornalista sira iha Palásiu Prezidensiál Dili, tersa ne’e.
Antes ne’e, loron 20 fulan-Marsu 2025 Supremu Tribunál Judisiál (STJ) aseita rekursu ne’ebé aprezenta husi Defeza Arnolfo Teves Jr, Advogadu Privadu, José Ximenes, iha Dezembru tinan kotuk hodi solisita Supremu Tribunál Justisa labele halo estradisaun ba nia kliente hodi haruka fila-fali bá nia nasaun orijen, Filipina.
Hafoin Supremu Tribunál Justisa halo tiha análize ba rekursu referidu, nune’e Supremu Tribunál Justisa, kinta ne’e, liuhusi juíz plenáriu na’in-tolu, Maria Natércia Gusmão Pereira, António Helder Viana do Carmo, Edite Palmira dos Reis, deside indefere pedidu estradisaun ne’ebé aprezenta husi Governu Filipina mai Govenu Timor-Leste atu halo estradisaun ba Teves.
Desizaun Supremu Tribunál Justisa nian ne’e bazeia ba artigu 35 husi Konstituisaun RDTL kona-ba estradisaun no espulsaun iha númeru datoluk ne’ebé hateten, labele iha estradisaun tan krime ida, bainhira Estadu ne’ebé husu estradisaun bele fó kastigu mate-kotu ka kastigu to’o mate, ka bainhira iha tada nanis katak atu iha tortura ka tratamentu aat degradante ba ema-ne’ebé atu hetan estradisaun.
“Iha desizaun ne’e, Tribunál Rekursu bazeia ba artigu 35 númeru 3 husi Konstituisaun RDTL, indefere pedidu estradisaun. Plenáriu husi juíz Tribunál Rekursu delibera unanimidade tuir fundamentu artigu 35 númeru 3 iha Konstituisaun RDTL, hodi rekuza pedidu estradisaun ba Arnolfo Alipit Teves Junior,” sita husi akordaun Supremu Tribunál Rekursu ne’ebé Tatoli asesu.
Iha loron 15 Dezembru 2024, defeza husi Arnolfo Teves Jr, Advogadu Privadu, José Ximenes, hatama rekursu bá Supremu Tribunál Justisa hodi husu Supremu Tribunál Justisa labele halo estradisaun ba Arnolfo Teves Jr.
Notísia Relevante: Advogadu lamenta detein Arnolfo iha edifísiu Servisu Migrasaun
Jornalista : Hortencio Sanchez
Editór : Cancio Ximenes
