OEKUSI, 28 Maiu 2025 (TATOLI) – Diretór Diresaun Rejionál Infraestrutura (DRI), Remígio Nuno Sila, informa projetu emerjénsia ba reabilitasaun estrada rurál kilometru hitu hahú husi Bonkobeno Huabanais liga ba Oésilo Sentru, kompañia sei nahe hotu simentu inklui bee-dalan no ponte ki’ik.
Projetu reabilitasaun ne’e ezekuta husi kompañia Fifna Unipesoál Lda ho valór kontratu rihun $621-resin. Verba ne’e autoridade RAEOA aloka iha Fundu Infraestrutura nasionál nu’udar projetu emerjénsia.
“Planu husi DRI hamutuk ho kompañia, bazea ba proposta mai husi kompañia planu ne’ebé iha sei nahe hotu ho simentu kompleta kedas obra ki’ik balu signifika estrada ne’e ita sei kontinua finaliza ho plan-konkrit (nahe simentu) ho konstrusaun komplementár hanesan drainajén, bee-dalan inklui ponte ki’ik balun,” Remígio Sila, dehan iha Oekusi, ohin.
Notísia relevante:Populasaun sujere reabilitasaun estrada rurál iha Huabanais presiza nahe ho simentu
Bazea fiskalizasaun husi Diresaun Rejionál Infraestrutura, kompañia hatudu komportamentu di’ak tanba kumpre BoQ no rekomendasaun sira-ne’ebé obra públiku propoin.
“Agradese tanba kompañia Fifna Unipesoál Lda, ne’ebé mak sai hanesan implementadór ba obra ne’e progresu la’o di’ak tebes, tanba prosesu hamoos dalan ne’e finaliza ona, pavimentu rai hela de’it kilometru 1,3 hodi finaliza, ne’ebé ita nafatin espera atu garante kualidade tanba iha fiskaliza ona, kompañia kumpre saida mak propoin ona,” nia informa.
Iha fatin hanesan, Jestór sub-rejiaun Oésilo, Benedito Ulan, orgullu tanba estrada ne’e foin reabilita no durante ne’e hamutuk ho komunidade sira koopera ho autoridade RAEOA no kompañia atu estrada ne’e bele la’o ho sesusu.
“Estrada rurál seidauk ukun-aan to’o 2025 ne’e mak foin hadi’a, ne’ebé ha’u mós observa tanb ne’e iha ha’u-nia área, ita sempre enkoraja komunidade sira, atu koopera, afeta ai-oan ka rai no uma, ko’alia didi’ak ho kompañia no hato’o mai xefe suku rejista hodi entrega ba parte relevantes ira atu konsidera iha futuru, importante mak estrada tenki la’o, tanba foin daudaun Avo Xanana mai mós ami rekomenda tenki nahe ho simenti, tanba iha tempu udan rai tahu no hamosu mo rai rahun,” nia orgullu.
Notísia relevante:PM Xanana husu Autoridade RAEOA reabilita estrada rurál sira tenke ho kualidade
Abitante Huabanais-Oésilo levanta kestaun balun ba Primeiru-Ministru atu konsidera
Jornalista: Abílio Elo Nini
Editór: Florencio Miranda Ximenes
