KOVALIMA, 04 Juñu 2025 (TATOLI) – Prezidente Autoridade Munisípiu Kovalima, Miguel Armada Cardoso, Kuarta-ne’e, organiza funsionáriu no alunu sira hala’o limpeza jerál iha tasi-ibun Suai Loro hodi komemora semana mundiál oseanu no ambiente, iha Postu administrativu Suai, munisípiu Kovalima.
“Ita Kovalima ohin mak hala’o lansamentu hala’o limpeza jerál, iha tasi Suai Loro hodi hatudu ba ita-nia komunidade ne’ebé ho nia tema Ha’u nia Tasi ha’u nia Timor. Kovalima dehan Ha’u nia Tasi Kovalima no ha’u nia Kovalima tanba ne’e ita presiza halo limpeza nune’e ambiente tasi moos”, Autoridade Kovalima, Miguel Armada Cardoso, hato’o iha nia diskursu bainhira lansa limpeza iha tasi Suai Loro, ohin.
Hakarak tasi Suai Loro nia ambiente ne’ebé furak Kovalima-oan mak estima hodi halo limpeza nune’e bele garante ambiente tasi Suai Loro ho moos.
Autoridade Kovalima, iha biban hanesan, kestiona kargu xefia sira katak organiza nia funsionáriu ka la’e tanba funsionáriu barak mak la partisipa iha atividade halo limpeza jerál iha tasi Suai Loro.
Iha sorin seluk, Alunu husi EBC Suai Loro, Delvia Aprilia Soares Madeira, hateten katak presiza halo limpeza jerál nune’e ambiente tasi bele moos. Se la halo limpeza ambiente tasi la moos.
“Ita haree tasi-ibun nakonu ho plástiku no tipu lixu seluk bainhira la halo limpeza bele estraga mós ahu-ruin sira iha tasi-ibun sira”, nia dehan.
Ho nune’e bainhira hala’o ona limpeza jerál presiza tau avizu nune’e tasi-ibun labele nakonu ho lixu sira.
“Hafoin ita halo limpeza maibé bainhira la taka avizu ema balun la iha konsiénsia soe lixu nune’e ambiente tasi ladun saudavel”, nia konsidera.
Entretantu, Semana Mundiál Ambiente no Loron Mundiál Oseanu nian selebra tinan-tinan hodi promove konxiénsia kona-ba prezervasaun ambientál no protesaun ba ekosistema tasi nian.
Jornalista:Celestina Teles
Editór: Rafael Ximenes de A. Belo
