DILI, 04 Juñu 2025 (TATOLI)-Sekretáriu Estadu asuntu Veteranu, César dos Santos da Silva “Merak”, hatete Governu nafatin fó konfiansa ba empreza Bobolait hodi kontinua projetu konstrusaun monumentu 12 Novembru (12N).
“To’o agora progresu fíziku foin atinje pursentu 45, tanba implikasaun oioin”, Merak dehan ba TATOLI iha nia knaar fatin Kaikoli, ohin.
Merak hatutan tinan ne’e seidauk bele finaliza tanba komplikadu hela ba estatua ne’ebé atu hatuur iha monomentu nia leten. Ne’ebé mosu ideia oin-oin. Komité 12 Novembru hakarak estatua ne’e maihusi Portugal tanba liga ho istóriku Portugal ho Timór ne’e. Empreza Bobolait hakarak prodús estatua iha Xina.
“Nune’e atu hanoin nafatin istória ne’e, maibé tenke iha mós desizaun husi KAFI. Iha 15 Jullu tinan kotuk ekipa konjunta entre ADN, Ministériu no Komité 12 Novembru ba Portugál ba hodi observa. To’o agora hein de’it hosi ADN maibé seidauk iha desizaun”, dehan nia.
Governante ne’e hatete agora orsamentu tuir survei ne’ebé hala’o iha Portugal ne’e presiza milaun $1 ba leten. Agora kompañia ne’ebé manán ka na’in ba prodús ne’e hakarak buat ne’e halo iha Xina ho valór ne’ebé kiik rihun $300.
“Tanba ne’e mak prosesu sei iha hela KAFI ninian, seidauk bele define loos rua ne’e”, nia tenik.
Nia dehan kestaun seluk mak rate ne’ebé iha dalan tama ba Saudozu Sebastião Gomes nian ne’e nakonu, entaun presiza tán ko’alia ho família.
“Hakarak loke dalan husi Pai Nosso ba to’o iha Sebastião nia rate, ne’e rate lubuk ida mak iha hela ne’ebá, ne’e mós implika hotu, seidauk hasai, família balun aseita, balun la aseita, ne’ebé sei iha hela faze negosiasaun”, dehan Merak.
Orsamentu konstrusaun ne’ebé aloka ba monumentu Santa Kruz ka Memoriál 12 Novembru ne’e hamutuk $1.385.389,88.
Konstrusaun hahú konstrui iha loron 22 setembru 2021 to’o 22 setembru 2022 maibé seidauk konklui, nune’e Governu liuhusi Ministériu Asuntu Kombatente Libertasaun Nasionál (MAKLN) prolonga to’o tinan 2023 maibé seidauk hetan konkluzaun.
Notísia relevante: Governu-K12N sei observa konstrusaun estátua 12 Novembru iha Portugál
Jornalista : Osória Marques
Editora : Rita Almeida
